ህወሓት የተመሰቃቀለ ሁኔታ ውስጥ እንደሚገኝ ተነገረ

26 ዓመታት ሀገሪቱን አንቆ የያዛት ህወሓት አሁን አሁን ነገሮች ባሰበው መንገድ እየሔዱለት እንዳልሆነ ምንጮች ጠቆሙ፡፡ በተለይ በአንድ ዓመት ጊዜ ውስጥ ሁለት ጊዜ ከፍተኛ ህዝባዊ ተቃውሞ መቀስቀሱ ህወሓትን እንዳልነበረ እንዳደረገው ምንጮች ይገልጻሉ፡፡ በተተረማመሰ ሁኔታ ውስጥ የሚገኘው ህወሓት፣ መልሶ በሁለት እግሩ ለመቆም እየዳከረ ቢሆንም፣ ነገሮች በተመቻቸ ሁኔታ ሊሔዱለት አልቻሉም ይላሉ ስለ ጉዳዩ በቅርበት የሚያውቁ ምንጮች፡፡

አገዛዙ በሙስና የተጠረጠሩ ሰዎችን መያዝ ጀመርኩ ካለ በኋላ፣ እስሩ በማን ላይ ተጀምሮ በማን ላይ ማቆም እንዳለበት ለመወሰን እጅግ ተቸግሮ ቆይቷል፡፡ በሙስና ተጨማልቀዋል የተባሉ ሰዎችን እንደነገሩ መያዝ የጀመረው ህወሓት፣ የእስሩ መደምደሚያ ማን መሆን እንዳለበት ለመወሰን መቸገሩን ምንጮቹ ይገልጻሉ፡፡ በዚህም የተነሳ፣ እስሩ ማቆሚያ አጥቶ እስከ አሁን ድረስ ሰዎች በመታሰር ላይ ናቸው፡፡ ሆኖም በሚኒስትር ደረጃ ላይ ካሉ ባለስልጣናት ማን መታሰር አለበት የሚለው ጉዳይ እስካሁን ድረስ መቋጫ አላገኝም ተብሏል፡፡

በሌላ በኩል፤ ከአምባሳደሮች ሹመት ጋር በተገናኘ፤ 12 አምባሳደሮችን በተለያዩ ሀገራት የሾመው ህወሓት፣ በውጭ የነበሩት የቀድሞ አምባሳደሮች ደግሞ ወደ ሀገር ቤት እንዲመለሱ ጥሪ አድርጓል፡፡ ጥሪ ከተደረገላቸው አምስት አምባሳደሮች ከሁለቱ በቀር ሌሎች ወደ ሀገር ቤት የገቡ ሲሆን፣ በየትኛው የስልጣን እርከን ይቀመጡ የሚለው ጉዳይ ደግሞ ሌላ የተምታታ ነገር መፍጠሩን ምንጮች ይጠቁማሉ፡፡

በዚህ ዓመት ጥቅምት ወር ላይ ከተቋቋመው የጠቅላይ ሚኒስትሩ ካቢኔ ውጭ ተደርገው ስራ ፈትተው የተቀመጡ እና እንደ አቶ ጌታቸው ረዳ ያሉ ሰዎችን የሆነ ቦታ ለመወሸቅ ጥረት እየተደረገ እንደሚገኝ መረጃዎች ይጠቁማሉ፡፡ ባጠቃላይ ህወሓት በዚህን መሰል የተመሰቃቀለ ሁኔታ ውስጥ እንደሚገኝ የጠቆሙት ምንጮች፣ ህወሓት በደመ ነፍሱ እየተመራ እንደሚገኝ ይናገራሉ፡፡

የዶክተር ፍቅሩ ማሩ የዛሬ የፍርድ ቤት ውሎ

በጌታቸው ሺፈራው

ዶክተር ፍቅሩ ማሩ በእነ መቶ አለቃ ማስረሻ ሰጤ የክስ መዝገብ 13ኛ ተከሳሽ ናቸው። በአጋጣሚ ለተከሰተውና ሰባራ ሳንቲም ላልወጣበት የቂሊንጦ ቃጠሎ ማስፈፀሚያ በሚሊዮን ብር ወጭ አድርገዋል በሚል ነው የተከሰሱት። ትናንት ነሃሴ 10/2009 ዓም በመዝገቡ ላይ አራት ምስክሮች ቀርበዋል። ከአራቱ ምስክሮች መካከል አንዱ ዶክተር ተስፋዬ ያዕቆብ ይባላሉ። ዶ/ር ተስፋዬ የጥቁር አንበሳ ሀኪም የነበሩና ሰው ገድለው የታሰሩ መሆናቸውን እሳቸው ጋር አንድ ዞን ታስሮ የነበረ ወዳጄ አጫውቶኛል። ዶክተር ተስፋዬ በአተት ሰበብ ከቤተሰብ የሚገባ ምግብ ስለመከልከሉና ሌሎች ጉዳዮች ላይ የአቃቤ ህግ ምስክር ሆነው ቀርበዋል።

ፍረድ ቤቱ:_ ስም?

ዶ/ር ተስፋዬ ያዕቆብ

እድሜ?

60

ስራዎት?

ሀኪም

አድራሻ?

አዲስ አበባ

ክፍለ ከተማ?

አድራሻዬን ለመንገር ፈቃደኛ አይደለሁም።

አቃቤ ህግ: እስኪ የሚያውቁትን ለችሎቱ ያስረዱልን?

መልስ:_ ነሀሴ 26/2008 አንድ ሀኪም ቂሊንጦ ውስጥ አተት ተነስቷል ብሎ አስረዳ። የቤተሰብ ምግብ አንደማይገባ ተነገረን። በጊዜው ሁሉም ታራሚ ቅሬታውን አሰምቷል። ከዛ በሁዋላ ምግብ እንዳይገባ የሚገልፀው ማስታወቂያ ተለጠፈ። ሁላችንም ፈቃደኞች አልነበርንም። የእስር ቤቱን ምግብ የማንበላ ሰዎች አለን። አተት ሊመጣ የሚችለው በተበከለ ምግብ ነው። ከውጭ የተበከለ ምግብ ይመጣል ስለተባለ የተከለከለው ለታራሚው ጥቅም ነው።

እኔ ስለበሽታው ሁኔታ ገለፃ አድርጌያለሁ። በሚዲያ( በማይክራፎን) አስተላልፍ ተብዬ ተናግሬያለሁ። በማስረዳበት ጊዜ ታራሚው አጉረመረመ። እኔ የበሽታውን መነሻና እንዴት መከላከል እንደሚቻል ነው ያስረዳሁት። ነሃሴ 28/2009ዓም ከተቆጠርን በሁዋላ እስር ቤቱ የሚያቀርበውን ቁርስ አንበላም ተባለ።……… ግርግር ተፈጠረ። ከሌላ ዞን የጥይት ድምፅ ተሰማ። እኔ ጋር የነበሩ እስረኞችን ተባራሪ ጥይት እንዳይመታቸው ቤታቸው ውስጥ እንዲቀመጡ እነግራቸው ነበር። ከሌላ ቤት እየመጡ ውጡ ወንድሞቻችን እየሞቱ ነው የሚሉ ነበሩ። አንድ በጥይት የተመታ ሰው ነበር።

በሁዋላ አበበ የሚባል ከጎንደር የመጣ መቶ አለቃ በታኝ ፖሊሶች መጥተዋል፣ ከታራሚዎች ጋር ይገጥማሉ። ችግር ይገጥመናል፣ ታራሚውን ወደ ቤቱ እንዲገባ፣ ፖሊሶችም ወደ ውስጥ እንዳይገቡ እናድርግ አለኝ። እኛም ተስማምተን፣ አረጋግተን እያንዳንዱ ሰው እቃውን ይዞ እንዲወጣ አደረግን። ( ለአቃቤ ህግ ጥያቄዎች የሰጡት መልስ ጠቅለል አድርጌ አቅርቤው ነው)

ዶክተር ፍቅሩ ማሩ ( መስቀለኛ ጥያቄ):_ ከውጭ የሚመጣ ምግብ በጥንቃቄ ስለማይሰራ ነው አተት የሚያመጣው?

ዶ/ር ተስፋዬ:_ የተበከለ ምግብ ነው አተት የሚያመጣው!

ዶ/ር ፍቅሩ: እሱን አውቃለሁ! ከውጭ የሚመጣው ነው የማረሚያ ቤቱ ነው አተት ሊያመጣ የሚችለው?

ዶ/ር ተስፋዬ:_ ከውጭም ከውስጥም ይሁን የተበከለ ከሆነ ነው!

ዶ/ር ፍቅሩ: _ ገብቶኛል! ከቤተሰብ የሚገባው የተከለከለው የተበከለ ስለሆነ ነው?

ዶ/ር ተስፋዬ: ይበከላል ተብሎ ስለሚታብ!

ዶ/ር ፍቅሩ:_ አተት በተበከለ ውሃ ይመጣል ብለዋል። እስር ቤቱ የታሸገ ውሃ ያቀርባል?

ዶ/ር ተስፋዬ:_ አያቀርብም!

ዶ/ር ፍቅሩ:_ ታዲያ የእስር ቤቱ ውሃ አተት አያመጣም?

ዶ/ር ተስፋዬ:_ ይታከማል። በአጋጣሚ ካልተበከለ አያመጣም።

ዶ/ር ፍቅሩ: ያመጣል? አያመጣም?

ዶ/ር ተስፋዬ: ያመጣል ብዬ አልገምትም!

ዶ/ር ፍቅሩ: መግለጫ ሰጥቻለሁ ሲሉ ነበር!

ዶ/ር ተስፋዬ: አዎ!

ዶ/ር ፍቅሩ: ምን ስለሆኑ ነው መግለጫ የሚሰጡት?

ዶ/ር ተስፋዬ: ሀኪም ስለሆንኩ!

ዶ/ር ፍቅሩ: ተቀጥረው ነው?

ዶ/ር ተስፋዬ: እስረኛ ነኝ። የሙያ ግዴታ አለብኝ!

ዶ/ር ፍቅሩ: ማንም ሀኪም ተነስቶ መግለጫ መስጠት ይችላል?

ዶ/ር ተስፋዬ: የማረሚያ ቤቱን ህግ አላውቀውም!

ዶ/ር ፍቅሩ: ነሀሴ 26 መግለጫ ሰጥተዋል ያሏቸው ሀኪም የምን ሀኪም ናቸው?

ዶ/ር ተስፋዬ: ዶ/ር አለሙ ይባላሉ። ሀላፊ ናቸው።

ዶ/ር ፍቅሩ: የምን ሀላፊ? የቂሊንጦ ነው የቃሊቲ?

ዶ/ር ተስፋዬ: የሁሉም መሰለኝ።

ዶ/ር ፍቅሩ: አሁንም ምግብ ከውጭ እየገባ ነው፣ አሁንስ ሊበከል አይችልም?

ዶ/ር ተስፋዬ…………… (መልስ አልሰጡም)

ዶ/ር ፍቅሩ: ከውጭ የሚገባ ምግብ ማረሚያ ቤቱ ከሚያዘጋጀው በላይ የተከለ ነው?

ዶ/ር ተስፋዬ: አይመስለኝም!

ዶ/ር ፍቅሩ: በአተት ተያዙ የተባሉት ሰዎች በምን እንደታመሙ ያውቃሉ?

ዶ/ር ተስፋዬ: ስላላየሁ አተት ነው አይደለም ማለት አልችልም!

አግባው ሰጠኝ: እርስዎ የቂሊንጦን የባንቧ ውሃ ጠጥተው ያውቃሉ?

ዶ/ር ተስፋዬ: ጠጥቼ አላውቅም!

አግባው:_ ታዲያ የተበከለ ይሁን አይሁን በምን አወቁ?

ዶ/ር ተስፋዬ: ውሃ እንዴት ታክሞ ለህዝብ እንደሚደርስ አውቃለሁ።

አግባው: የእስር ቤቱ ይታከም አይታከም ያውቃሉ?

ዶ/ር ተስፋዬ: ሳይታከም ለህዝብ አይደርስም!

አግባው:_ በሚል ነው?

ዶ/ር ተስፋዬ: በሚል ሳይሆን በእርግጠኝነት!

አግባው: የቧንቧውን ውሃ በጨርቅ አጥልለን እንደምንጠጣው አያውቁም?

ዶ/ር ተስፋዬ:_ አላውቅም! ( ለግንዛቤ ያህል:_ ዶ/ር ተስፋዬና አግባው አንድ ቤት ነበሩ)

መቶ አለቃ ማስረሻ ሰጤ : ከቃጠሎው በሁዋላ ያለው ሁኔታ ይበልጥ ለአተት አያጋልጥም?

ዶ/ር ተስፋዬ: ስለ አተት………………

መቶ አለቃ ማስረሻ: ያጋልጣል አያጋልጥም?

ዶ/ር ተስፋዬ: አጭር መልስ መስጠት አልችልም።

መቶ አለቃ ማስረሻ: ምግብ ከተከለከለበት የማረሚያ ቤቱ ሁኔታና ዝዋይ ከነበሩበት ሁኔታ የትኛው ለአተት ያጋልጣል?

ዶ/ር ተስፋዬ: ነው አይደለም የሚለውን ለመመለስ አተት ምንድን ነው የሚለውን……………

ፍርድ ቤቱ: ለተጠየቁት መስቀለኛ ጥያቄ መልስ መመለስ አለብዎት!

ዶ/ር ተስፋዬ: በማብራሪያ ነው መመለስ የምችለው!

መቶ አለቃ ማስረሻ: ዝዋይ የነበሩበት ሁኔታ ለበሽታ አያጋልጥም?

ዶ/ር ተስፋዬ: አያጋልጥም!

መቶ አለቃ ማስረሻ: ዝዋይ እያለን እጃችን ታጥበን ነበር የምንበላው?

ዶ/ር ተስፋዬ : እጃችን ታጠብን አልታጠብን፣ ባክቴሪያው ዝዋይ አልነበረም!

ፍርድ ቤቱ: ጥያቄውን ይመልሱ!

ዶ/ር ተስፋዬ: እኔ እታጠብ ነበር!

መቶ አለቃ ማስረሻ: ባክቴሪያው ዝዋይ መኖር አለመኖሩን በምን አረጋገጡ?

ዶ/ር ተስፋዬ: ቢኖር ሁሉም ይታመም ነበር!

መቶ አለቃ ማስረሻ: እኛ ወደዝዋይ ስንወሰድ ቂሊንጦ የቀሩ እስረኞች ነበሩ አይደል?

ዶ/ር ተስፋዬ: አላየሁም!

መቶ አለቃ ማስረሻ: እርስዎ 60 አመቴ ነው ብለዋል። ከእርስዎ በእድሜ ያነሱ የ20ና 30 አመት የህወሃት አባል ስለሆኑ ዞን አንድ ተለይተው እንደቀሩ አያውቁም?

ዶ/ር ተስፋዬ: አላውቅም!

ጌታቸር እሸቴ: እርስዎ ለምንድን ነው የማረሚያ ቤቱን ምግብ የማይበሉት?

ዶ/ር ተስፋዬ: ስለማይስማማኝ!

ጌታቸር እሸቴ: የማረሚያ ቤቱ ውሃ የከርሰ ምድር ውሃ መሆኑን ያውቃሉ?

ዶ/ር ተስፋዬ: አላውቅም!

ጌታቸር እሸቴ: የቂሊንጦ ውሃ ደፍርሶ አይተውት አያዉቁም?

ዶ/ር ተስፋዬ: አላውቅም!

( ለግንዛቤ ያህል! የቂሊንጦ ውሃ የከርሰ ምድር ሲሆን አሸዋ ተቀላቅሎ ስለሚመጣ እስረኛው በጨርቅ እያጠለለ ቀድቶ ነው የሚጠቀመው። ከቂሊንጦ ቃጠሎ በሁዋላ ወደ ዝዋይ የተወሰዱ እስረኞች ልብሰቸውን ተቀምተው፣ ባዶ እግራቸውን ባዶ ወለል ላይ ይተኙ ነበር። ለሳምንት ለሁለት ለሁለት ተጣምረው ታስረው ባዶ ወለል ላይ ነበር የሚተኙት። 285 እስረኛ ሁለት ሽንት ቤት ባለው አንድ ቤት ታስሮ የነበር ሲሆን ውሃ ስለሚጠፋ ምግብ የሚባላው እጁን ሳይታጠብ ነበር።)

የሕወሃት ከፍተኛ ባለስልጣናትን ጨምሮ በስልጣንና በጡረታ ላይ በሚገኙ የተወሰኑ ባለስልጣናት ላይ ከሀገር እንዳይወጡ እገዳ ተጣለ

ከባለስልጣናቱ ጋር ቅርበት ያላቸው ወገኖችም ሊወጡ ሲሉ ከቦሌ አለም አቀፍ አውሮፕላን ማረፊያ ተይዘው መመለሳቸውንም ምንጮቹ አመልክተዋል። የእስር እርምጃውን እየወሰደ ያለው ቡድን የፍርድ ቤት ትእዛዝ በማውጣት የጣለው ግልጽ አገዳና በመምሪያ የተላለፈ ማስጠንቀቂያ ባይኖርም ከሐገር ለመውጣት የተከለክሉ መኖራቸውን ግን የኢሳት ምንጮች አረጋግጠዋል።

ግልጽ ክትትል የሚደረግባቸው ባለስልጣናት መኖራቸውም የታወቀ ሲሆን ይህ ክትትል የቀድሞ ባለስልጣናትን እንዲጭምርም መደረጉ ታውቋል። በዚህ ረገድ የውጭ ሀገር ጉዞ አስቀድሞ ያቀደና በድንገት የተዘጋጀ ባለስልጣናት ጭምር በተሰጣቸው ትእዛዝ መሰረት ከሀገር እንዳይወጡ ተደርገዋል።

ከቦሌ አለም አቀፍ አውሮፕላን ጣቢያ የተመለሰ ባለስልጣን ባይመዘገብም የቅርብ ዘመዶቻቸውና ሌሎች የንግድ ሰዎች ከአውሮፕላን ማረፊያው ብቻ ሳይሆን ከተሳፈሩበት አውሮፕላን ውስጥ ጭምርም እንዲመለሱ መደረጉን ምንጮቹ ገልጸዋል። ከፍተኛ ባለስልጣናቱ ለጉዞ ከመነሳታቸው በፊት አስቀድሞ በስልክ መመሪያ ስለሚሰጣቸው ቦሌ ላይ ሳይደርሱ ጉዟቸውን ይገታሉ ይላል መረጃው።

ከቦሌ አለም አቀፍ አውሮፕላን ማረፊያ ከተመለሱት ውስጥ የታሰሩት ጥቂቶች ሲሆኑ ሌሎቹን ለግዜው ከሀገር መውጣት አትችሉም በሚል ወደ ቤታቸው እንደሚመልሷቸው መረዳት ተችሏል። በተለይ ገንዛባቸው እንዳይንቀሳቀስ እገዳ ከተጣለባቸው አምስት የኮንስትራክሽን ድርጅቶች ጋር በተያያዘ ምርመራው በከፍተኛ ደረጃ በመቀጠሉ ከነዚህ ኩባንያዎች ጋር ግንኙነት አላቸው የሚባሉ ባለስልጣናት በግልጽ ከሀገር እንዳይወጡ የቃል ትእዛዝ እንደተሰጣቸውም የኢሳት ምንጮች ገልጸዋል። በዝቅተኛ እርከን ላይ በሚገኙ ኢንጂነሮች ጥቂት የአክሲዮን ድርሻና በዋናነት በዶክተር አርከበ እቁባይ ቤተሰብ ከፍተኛ ድርሻ ከተቋቋመው አሰር ኮንስትራክሽን ጋር በተያያዘ የቀጠለው ምርመራ በአቶ አርከበ እቁባይና በዙሪያቸው ላይ ያነጣጠረ መሆኑን መረዳት ተችሏል።

በገምሹ በየነ ኮንስትራክሽን ድርጅትና ኢሊሊ ሆቴል ላይ የተጣለው የፍርድ ቤት እገዳ በነባር የኦህዴድ አመራሮች በተለይም በአቶ ሶፊያን አህመድና በአቶ አባዱላ ገመዳ ላይ ያነጣጠረ ቢሆንም አሳሪው ክፍል አቶ አባዱላ ገመዳ ላይ ትኩረት ስለማድረጉ የሚያሳዩ መረጃዎች አልተገኙም። አቶ ሶፊያን አህመድን በተመለከተ ግን ዊንድሶር ካናዳ እስከሚገኘው ወንድማቸው አቶ መሀመድ አደም ድረስ የዘለቀ የማጣራት ስራ እየተከናወነ መሆኑን ምንጮች ለኢሳት ተነግረዋል።

ሌላው እገዳ የተጣለበት ዲ ኤም ሲ ኮንስትራክሽን ንብረትነቱ የአቶ ዳንኤል ማሞ ሲሆን ይህ ድርጅት ከጅማ አስፋልት መንገድ ስራ እንዲሁም ከለገሀሩ ማሪታይም ህንጻ ብሎም በደቡብ ክልል ከሰራቸው በርካታ ፕሮጀክቶች ጋር በተያያዘ ምርመራ እየተካሄደበት መሆኑ ታውቋል። ጠቅላይ ሚኒስትር ሃይለማርያም ደሳለኝ ከኩባንያው ጋር ባላቸው ግንኙነት ዙሪያም ምርመራው መቀጠሉ ተመልክቷል። ሆኖም ርምጃውን የሚወስደው ክፍል ለአቶ ሃይለማርያም ማስጠንቀቂያ ከመስጠት ባለፈ ርምጃ የመውሰድ ፍላጎት እንደሌለው ግን ምንጮች ገልጸዋል። የማነ ግርማይ ኮንስትራክሽን ድርጅት በ5ኝነት ሀብቱ እንዳይንቀሳቀስ የታገደበት ድርጅት ሲሆን ይህ ኩባንያ ከስኳር ኮርፖሬሽኖች ጋር በተያያዘ ከፍተኛ ሀብት የሰበሰበ እንደሆነም ተመልክቷል።

የንብረትነቱም ድርሻ ከአቶ የማነ ግርማይ ይልቅ የአቶ አባይ ጸሀዬ ይበልጣል የሚባለው ይህ ኩባንያ ላይም የተጀመረው ምርመራ ቢቀጥልም እስራቱ ወደ ላይ ሳይወጣ ስርስሩ ላይ ተገድቧል። በሌብነት ተጠርጥረው የታሰሩ ግለሰቦች ቁጥር 56 በደረሰበት በአሁኑ ወቅት በሚኒስትር ደረጃ የተጠየቀ ወይንም የታሰረ እንደሌለ ይታወቃል። ከፍተኛው ባለስልጣን እስረኛ የገንዘብና ኢኮኖሚ ትብብር ሚኒስትር ዴኤታ ወይንም ተቀዳሚ ምክትል ሚኒስትር አቶ አለማየሁ ጉጁ ብቻ ሲሆኑ ሌሎቹ ቢሮ ሃላፊዎች እንዲሁም ዳይሬክተሮችና በዝቅተኛ እርከን ላይ የሚገኙ ግለሰቦች መሆናቸው ይታወቃል።

በሙስና ወንጀል የተጠረጠሩ የመንግሥት ኃላፊዎችና ባለሀብቶች ቁጥር 53 ደረሰ

ከ1.3 ቢሊዮን ብር በላይ በሕዝብና በመንግሥት ሀብት ላይ ጉዳት በማድረስ የተጠረጠሩት የገንዘብና ኢኮኖሚ ትብብር ሚኒስትር ዴኤታ አቶ ዓለማየሁ ጉጆ፣ የኢትዮጵያ መንገዶች ባለሥልጣን የቀድሞ ዋና ዳይሬክተር አቶ ዛይድ ወልደ ገብርኤል፣ በስኳር ኮርፖሬሽን የመስኖና ቤቶች ልማት ፕሮጀክት ልማት ዘርፍ ምክትል ዋና ዳይሬክተር አቶ ኪሮስ ደስታና ሀዚ አይ አይ ደረጃ አንድ ጠቅላላ ተቋራጭ ባለቤት አቶ ዛኪር መሐመድ ናቸው፡፡

የፌዴራል ፖሊስ መርማሪ ቡድን እያንዳንዱ ተጠርጣሪ ምን ያህል በሕዝብና በመንግሥት ላይ ጉዳት እንዳደረሰ፣ ለፌዴራል ከፍተኛ ፍርድ ቤት ልደታ ምድብ ሁለተኛ ወንጀል ችሎት አስረድቷል፡፡

አቶ ዓለማየሁ ጉጆ የገንዘብና ኢኮኖሚ ትብብር ሚኒስቴር አሠራሩን ዘመናዊ ለማድረግ የሚያዘረጋውን ቴክኖሎጂ መመርያንና ደንብን መሠረት ያደረገ ዓለም አቀፍ ጨረታ ማውጣት ሲገባቸው፣ ለማይታወቅና በቂ ልምድ ለሌለው ድርጅት በመስጠት ከ2.2 ሚሊዮን ዶላር በላይ ጉዳት እንዲደርስ ማድረጋቸውን መርማሪ ቡድኑ አስረድቷል፡፡ በተጨማሪም መከፈል ያልነበረበትን 280,000 ብር ሲፒኦ በማሠራት ክፍያ እንዲፈጸም በማድረግ ሥልጣናቸውን በመጠቀም፣ የመንግሥትን ሥራ በማያመች አኳኋን መምራታቸውንም አክሏል፡፡ በፍርድ ቤቱ ያቀረበው የምርመራ ሒደት መነሻ እንጂ ሙሉ ምርመራ አለማድረጉን የገለጸው መርማሪ ቡድኑ፣ ለቀሪ የምርመራ ጊዜ 14 ቀናት እንዲፈቀድለት ጠይቋል፡፡

አቶ ዓለማየሁ በሰጡት ምላሽ እንደተናገሩት፣ በተጠረጠሩበት ጉዳይ የተደራጀ መረጃ በመሥሪያ ቤቱ ይገኛል፡፡ በእሳቸው ግምት እስከተያዙበት ባለው ጊዜ ውስጥ መርማሪ ቡድኑ ምርመራውን እያጠናቀቀ መሆኑን ተናግረዋል፡፡ የስኳር ሕመምተኛ መሆናቸውን ለፍርድ ቤቱ ገልጸው፣ ታስረው የሚገኙበት ክፍል ውስጥ 20 ሰዎች በመኖራቸው መንቀሳቀስ እንደማይችሉ ጠቁመዋል፡፡ የስኳራቸው መጠን በከፍተኛ ሁኔታ በመጨመሩ አሥጊ ሁኔታ ላይ መሆናቸውን ገልጸዋል፡፡ ከተያዙ ቀን ጀምሮ ቤተሰቦቻቸውንም ሆነ ማንንም ሰው ማግኘት ባለመቻላቸው፣ በቂና አስተማማኝ ዋስ ጠርተው ጉዳያቸውን በውጭ ሆነው እንዲከታተሉ ፍርድ ቤቱን ጠይቀዋል፡፡

አቶ ዛይድ ወልደ ገብርኤልን በሚመለከት መርማሪ ቡድኑ ለፍርድ ቤቱ እንደገለጸው፣ ለተለያዩ ተቋራጮች የተሰጡ አምስት የመንገድ ግንባታ ፕሮጀክቶች ጥራታቸውን ያልጠበቁ ዲዛይኖችን በማሠራት፣ የኮንትራት ጊዜያቸውን ባለመጥቀስ፣ የግንባታ ጊዜ በማራዘምና ከኮንትራክተሮች ጋር በመመሳጠር በሕዝብና በመንግሥት ላይ ከአንድ ቢሊዮን ብር በላይ ጉዳት ማድረሳቸውን አስረድቶ፣ ለተጨማሪ ምርመራ 14 ቀናትን ጠይቋል፡፡

አቶ ዛይድ በጠበቃቸው በኩል ለፍርድ ቤቱ እንደገለጹት፣ መርማሪ ቡድኑ የገለጸው በሰነድ የሚታይ በመሆኑ የጠየቀው 14 ቀናት ተጨማሪ የምርመራ ጊዜ ተገቢ አይደለም፡፡ አቶ ዛይድ ባለሥልጣኑን ከለቀቁ ሁለት ዓመት እንዳለፋቸውና መንግሥት ከአገር ውጭ ለሥራ መድቧቸው እየሠሩ መሆናቸውን ጠበቃው አስረድተዋል፡፡

የስኳር ኮርፖሬሽኑ አቶ ኪሮስ ደስታ ደግሞ የመስኖና ቤቶች ልማት ፕሮጀክት ምክትል ዋና ዳይሬክተር ሆነው ሲሠሩ፣ ለጣና በለስ ፕሮጀክት ቧንቧ ግዥ በጨረታ ከቀረበው ዋጋ በላይ ለሦስት ጊዜያት 2,983,396 ብር፣ 131,554,000 ብር እና 49,559,992 ብር ግዢ እንዲፈጸም ማድረጋቸው ተገልጿል፡፡ ለየማነ ግርማይ ጠቅላላ ኮንስትራክሽን ድርጅት 20 ሚሊዮን ብር የሚገመት ንብረት በመስጠት በሕዝብና በመንግሥት ላይ ጉዳት ማድረሳቸውንና የመንግሥትን ሥራ በማያመች አኳኋን መምራታቸውን ለፍርድ ቤቱ አስረድቷል፡፡

አቶ ኪሮስ በሰጡት ምላሽ ድርጅቱን ከለቀቁ ሁለት ዓመት እንዳለፋቸው ተናግረዋል፡፡ ከቤታቸውም ሆነ ከመሥሪያ ቤቱ ሁሉም ዶክመንቶች የተወሰዱ መሆኑን በመግለጽ፣ ተጨማሪ 14 ቀናት የምርመራ ጊዜ መጠየቅ ተገቢ አይደለም ሲሉም ተቃውመዋል፡፡

ልጃቸው ዩኒቨርሲቲ ስለምትገባ በስልክ አግኝተው እንዲያነጋግሯት ፍርድ ቤቱ ትዕዛዝ እንዲሰጥላቸውም ጠይቀዋል፡፡ ቀደም ብሎ በተጠረጠሩበት የሙስና ወንጀል በቁጥጥር ሥር ውለው በታሰሩት እነ ካሣይ ካቻ መዝገብ የተካተቱት የሀዚ አይ አይ ደረጃ አንድ ሥራ ተቋራጭ ባለቤት አቶ ዛኪር መሐመድ ግምቱ 3,315,200 ብር የሆነ 500 በርሜል አስፋልት በውሰት ወስደው አለመመለሳቸውን መርማሪ ቡድኑ ለፍርድ ቤቱ አስረድቷል፡፡ አቶ ዛኪር በሁለት ወራት ውስጥ ለመመለስ የተዋሱትን አስፋልት፣ ከኃላፊዎች ጋር በመመሳጠር ሳይመልሱ መቅረታቸውንና ከላይ የተጠቀሰውን የገንዘብ መጠን ያህል ጉዳት ማድረሳቸውን አስረድቷል፡፡

አቶ ዛኪር በሰጡት ምላሽ መርማሪ ቡድኑ የገለጸውን ዕዳ መክፈላቸውን ገልጸው፣ ተጨማሪ 14 ቀናት ሊፈቀድ አይገባም ብለዋል፡፡ የዋስትና መብታቸውም እንዲከበርላቸው ጠይቀዋል፡፡

ፍርድ ቤቱ ክርክሩን ከሰማ በኋላ በሰጠው ትዕዛዝ የሁሉንም ተጠርጣሪዎች የዋስትና ጥያቄ ውድቅ አድርጓል፡፡ አቶ ዛኪር ቀደም ብለው ፍርድ ቤት ከቀረቡት ጋር ነሐሴ 11 ቀን 2009 ዓ.ም. እንዲቀርቡ በማለት የአሥር ቀናት ጊዜ ፈቅዷል፡፡ በአቶ ዓለማየሁ፣ በአቶ ኪሮስና በአቶ ዛይድ ላይ የቀረበውን የ14 ቀናት ጊዜ በመፍቀድ ነሐሴ 15 ቀን 2009 ዓ.ም. እንዲቀርቡ ቀጠሮ ሰጥቷል፡፡

ተጠርጣሪዎቹ በቤተሰብ፣ በሕግ ባለሙያና በሃይማኖት አባት የመጎብኘት ሕገ መንግሥታዊ መብት እንዳላቸው ፍርድ ቤቱ ገልጾ፣ የፌዴራል ፖሊስ ትዕዛዙን ተግባራዊ እንዲያደርግ አሳስቧል፡፡ ሕክምናን በሚመለከትም ከመንግሥት የሕክምና ቦታዎች በተጨማሪ፣ የሚፈልጉትን ሕክምና እንዲያገኙም እንዲያደርግ ትዕዛዝ ሰጥቷል፡

በኢትዮጵያ የተለያዩ አካባቢዎች የተቀሰቀሰውን ህዝባዊ ተቃውሞ ተከትሎ፣ በሀገሪቱ አለመረጋጋት መኖሩ ታወቀ፡፡

እንደ መረጃዎች ገለጻ፣ በተለይ በአማራ እና ኦሮሚያ ክልል ያለው የህዝብ ቁጣ አሁንም እንደቀጠለ ነው፡፡ ሰኞ እና ማክሰኞ በአማራ እና ኦሮሚያ ክልሎች የተካሔዱትን ህዝባዊ የስራ ማቆም አድማ እና ተቃውሞዎችን ተከትሎ የተፈጠረው ድባብ አሁንም ድረስ መኖሩን መረጃዎች እየጠቆሙ ነው፡፡ በሁለቱም ክልሎች የተለያዩ አካባቢዎች አሁንም መረጋጋት አለመኖሩን የጠቆሙት ማስረጃዎች፣ በዚህም የተነሳ መደበኛው የእለት እንቅስቃሴ መቋረጡን አመላክተዋል፡፡

በባህርዳር የተካሔደውን ከቤት ያለ መውጣት አድማ ተከትሎ ወጣቶችን በገፍ ሲያስር የቆየው አገዛዙ፣ ዛሬም በከተማዋ ከፍተኛ ቁጥጥር እያደረገ እንደሚገኝ ለማወቅ ተችሏል፡፡ በከተማዋ ያለው ድባብ ውጥረት የነገሰበት መሆኑን የሚገልጹት የዓይን እማኞች፣ የመንግስት ወታደሮችም በተለያዩ የከተማዋ መግብያ እና መውጫዎች መሰማራታቸውንም እማኞቹ ጠቁመዋል፡፡ እንዲሁም በዚያው በአማራ ክልል በደብረ ታቦር እና ደብረ ብርሃን ያለው ድባብ ከወትሮዉ የተለየ እና ተቃውሞ ያረገዘ ሆኖ ተገኝቷል፡፡ ሁለቱ ከተሞች ሰኞ ዕለት የስራ ማቆም አድማ ሲያደርጉ የቆዩ ሲሆን፣ ደብረ ታቦር በማግስቱ ማክሰኞ አድማውን ቀጥላ ውላለች፡፡ በወልድያ ከተማም የህዝብ ተቃውሞ መቀስቀሱን መረጃዎች እየጠቆሙ ናቸው፡፡

በተያያዘ የተቃውሞ ዜና፤ በኦሮሚያ ክልል የተለያዩ አካባቢዎች ህዝቡ መብቱን እየጠየቀ እንደሚገኝ ታውቋል፡፡ ሰኞ ዕለት ተቃውሞዋን በስራ ማቆም አድማ የገለጸችው አምቦ፣ ትላንትም በአድማዋ ቀጥላ መዋሏን መዘገባችን ይታወቃል፡፡ ዛሬም ቢሆን በከተማዋ መደበኛው እለታዊ እንቅስቃሴ አለመከናወኑን ለማወቅ ተችሏል፡፡ በወሊሶ ከተማም እንዲሁ ተመሳሳይ የተቃውሞ ድባብ መስፈኑን የጠቆሙት መረጃዎች፣ በአብዛኛው የሀገሪቱ ክፍል ያለው ሁኔታ አለመረጋጋት እንደሚስተዋልበት መረጃዎቹ አክለው ገልጸዋል፡፡

%d bloggers like this: