የአቶ በረከት መልቀቂያ ዜናና የሕወሐት ሴረኝነት

 

ይልቃል ጌትነት

አሁን ባለንበት ሁኔታ ሕወሐት/ኢሕአዴግ ከባድ ችግር ውስጥ መሆኑ አያጠራጥርም፡፡ ነገር ግን ድርጅቱ ያለበትን የውስጣዊ ችግር የእድገት ደረጃ በጥሞና ለመረዳት እያንዳንዱን ክንዋኔ በጥንቃቄ መመልከት ያስፈልጋል፡፡ የውስጣዊ ድርጅት ሽኩቻውን በአጠቃላይ ሀገራዊ ፖለቲካ ፋይዳው ጋር ሚዛን በመስራት ለእውነት የተጠጋ ትንተና ላይ ለመድረስ ሁለቱን ማለትም የድርጅት ውስጣዊ ሽኩቻውንና ሀገራዊ ፋይዳውን ሚዛን ላይ አስቀምጦ ማየት ያስፈልጋል፡፡ ሕወሐት እጅግ ሚስጥራዊ ድርጅት መሆኑ ይታወቃል፡፡ ሀገሪቱን የመምራት ኃላፊነትም በእነሱ ትክሻ ላይ መውደቁን ጠንቅቀው ያውቃሉ፡፡ በዚህ ሁሉ ሀገራዊ ምስቅልቅል ውስጥ የአቶ በረከትን መልቀቂያ ይፋ ማድረግ ለምን አስፈለገ? ለዚህ ጥያቄ ለእውነት የቀረበ መልስ ለማግኘት ሁለት መላምቶችን ማቅረብ ይቻላል፡፡


አቶ በረከት የድርጅቱ ጭንቅላት እንደሆኑ ይታመናል፡፡ አቶ አባዱላ የይስሙላ ፓርላማም ቢሆን በዓለም አቀፍ ግኝኙነት ደረጃ ሲታይ የነበሩበት ቦታ ትልቅ ገፅታ ነው፡፡ የእነዚህ ባለስልጣኖቸ መልቀቅ ሕወሐት/ኢሕአዴግ በከፍተኛ ደረጃ ተዳክሞና ሁሉንም ነገር መቆጣጠር አቅቶት ባለስልጣኖቹ ተስፋ በመቁረጥና በመደናገጥ ሀገራዊ ኃላፊነት መውሰድ የማይችሉበት ደረጃ ላይ በመድረሳቸው በግላቸው እየወሰኑ ነው ማለት ነው፡፡በመሆኑም እነዚህ ትልልቅ ባለስልጣኖች በእንድ ጊዜ ስልጣን መልቀቃቸው ከፍተኛ ችግር መኖሩንና ለሀገራዊ የፖለቲካ ለውጥ መቃረባችንን መገመት ይቻላል፡፡


ሌላው በአሁኑ ሰዓት ኦህዴድ ከሕወሐት የበላይነት በብዙ መልኩ የማፈንገጥ አዝማሚያና በኦሮሚያ ክልል ከሚንቀሳቀሱ የፖለቲካ ኃይሎች ጋር አጀንዳ መጋራትና የአላማ መደበላለቅ አለ ብሎ ሕወሐት ያምናል፡፡ የአባዱላ ገመዳ መልቀቅና ለመልቀቁ የሰጠው ምክንያት የኦሮሞን ህዝብ ለማነሳሳትና አባዱላ የህዝባዊ እንቅስቃሴው ቀጥተኛ ያልሆነ መሪ /informal leader/ ለመሆን በኦሮሞ ፖለቲከኞች የተቀነባበረ ነው በሚል ሕወሐት ይህንን የድርጅት ሽኩቻ ሚዛን ለማስጠበቅ የአቶ አባዱላን መልቀቅ በህዝብ ዘንድ በተለይም በማህበራዊ ሚዲያው ያገኘውን የዜና ሽፋን ለመበረዝና በአባዱላ ምክንያት በኦሮሚያ ክልል የተፈጠረውን የፖለቲካ ትኩሳት ዝቅ አድርጎ ማሳየት ስለነበረበት አቶ በረከት በተመሳሳይ ሁኔታ ከስራ እንዲለቁና የዜና ሽፋኑን እንዲቆጣጠረው አድርገዋል ብሎ መገመት ይቻላል፡፡

ይህንን ግምት የሚያጠናክረው ሕወሐት እጅግ ሚስጥራዊ ድርጅት መሆኑ፣አቶ በረከት ይሰሩበት የነበረው ቦታ ከህዝብ ገፅታ የራቀ በመሆኑ ዜናውን በአሁኑ ደረጃ ይፋ ሳያደርጉ በዝግታ መልቀቅ የሚችሉበት እድል ሰፊ በመሆኑ፣አቶ በረከትም በድርጅቱ ውስጥ ያላቸው ቦታ ከፍተኛና ሴራን ጠንቅቀው የሚያውቁ በመሆናቸው፣በድርጅትም ሆነ በሀገራዊ ፖለቲካ የእሳቸው መልቀቅ ዜና ፋይዳው ከፍተኛ መሆኑን ጠንቅቀው የሚያውቁ በመሆናቸው ድርጊቱ ታስቦና ታቅዶ የተደረገ ሊሆን እንደሚችል መገመት ይቻላል፡፡ በፖለቲካ ስራ ውስጥ አንድ ከባድ አደጋ ሲያጋጥም ያንን ዜና ለመሸፈንና አቅጣጫ ለማስቀየር አዳዳዲስ ዜናዎች ፈጥሮ አቅጣጫ ማስቀየርና ችግሩን ለመፍታት ትንፋሽ የማግኛ ዘዴ አድርጎ መጠቀም የተለመደ ተግባር ነው፡፡


ለማጠቃለል አሁን ያለው እውነታ በተራ ቁጥር 1 ተገለፀው ከሆነ ሀገራችን በፈጣን የለውጥ ማዕበል ላይ ስለሆነች ለውጥ ፈላጊ ኢትዮጵያውያን በጥንቃቄና በአስቸኳይ ከባድ ሀገራዊ ስራዎች መስራት ይጠበቅባቸዋል ማለት ነው፡፡ ነገር ግን ያለው እውነታ በተራ ቁጥር 2 ላይ የተገለፀው ከሆነ የውስጥ የድርጅት ሽኩቻ ለትግሉ ከፍተኛ አስተዋፆ ቢኖረውም ጊዜ የሚሰጥና በተረጋጋ ሁኔታ አስቦ ትግሉን ለመምራት የሚቻልበትን ዕድል ይፈጥራል የሚል እምነት አለኝ፡፡

Advertisements

የማይቃወማችሁ ከእናንተ ጋር ነውና አትከልክሉት አለው

ፖለቲካው ገና አልጠራም። ቶሎ የሚጠራም አይመስልም። አንድ የሚታይ ነገር ግን አለ- ሁሉም አጋጣሚውን ለራሱ በሚፈልገው መልኩ ሊጠቀምበት እየሞከረ መሆኑ። አንጥረኛው የጋለውን ብረት እንደሚፈልገው እየቀጠቀጠ እንደሚያበጃጀው ሁሉ፣ ሁሉም ወገን የጋለውን የአገራችንን ፖለቲካ በራሱ አምሳል ለመቅረጽ እየተሯሯጠ ነው። እስካሁን ባለው፣ በተለይ ከቅርብ ጊዜ ወዲህ እንደሚታየው፣ “ኢትዮጵያዊ አንድነታችን ” ትኩረት እያገኘ መምጣቱ ደስ የሚያሰኝ ነው። ማንም ያምጣው ማን ኢትዮጵያዊ አንድነት ሲሰበክ ደስ ይላል። መጽሃፍ ቅዱስስ እንዲህ ይል የለም፦
“አቤቱ፥ አንድ ሰው በስምህ አጋንንትን ሲያወጣ አየነው፥ ከእኛ ጋርም ስለማይከተል ከለከልነው አለው።
ኢየሱስ ግን። የማይቃወማችሁ ከእናንተ ጋር ነውና አትከልክሉት አለው።”
ማንም በኢትዮጵያ አንድነት ዙሪያ የማይቃወመን እስከሆነ ድረስ የአንድነት ስብከቱን እንዲቀጥል አንከልክለው፣ ይቀጥልበት። አንተም ስበከው፣ ጠላትህም ይስበከው፣ ኢትዮጵያዊ አንድነት ሲሰበክ ደስ ሊልህ ይገባል።
አገር አገር ነው። የፈለገውን ያክል የ“አለማቀፍ ዜግነት (global citizenship) አቀንቃኝ ብትሆን፣ ህልውናህን ከአገርህ ነጥለህ ልታዬው አትችልም። ሁሉም ቦታ ላይ ወይም የፈለከው ቦታ ላይ መወለድ አለመቻልህ፣ ህልውናህ አገር በሚባለው ጠፍር እንዲታሰር አድርጎታል። ልሽሸው ብትል እንኳን አትሸሸውም።
የአንድነታችን መላላት አገራችንን ብዙ ዋጋ አስከፍሏታል፣ የነጻነት ትግላችንንም አራዝሞታል። አሁን የሚሰማው የኢትዮጵያዊ አንድነት ድምጽ፣ በማንም ይሰበክ በማን፣ ሊደገፍ እንጂ ሊንቋሸሽ አይገባውም፣ ጥቅሙ ለአገራችን ብቻ ሳይሆን ለትግላችንም ነው። ሁላችንም በአንድ አገር አስፈላጊነት ዙሪያ ላይ ተመሳሳይ አቋም እስከያዝን ድረስ “ አንድ ነን ወይስ አይደለንም” በማለት የምናጠፋውን ጊዜ ሌሎች መብቶችን ለመጠየቅ እናውለዋለን። ጥቅስ አበዛህ ካላላችሁኝ ቅዱስ መጽሃፉ እንዲህ ይላል ፦
“አንዳንዶች ከቅንአትና ከክርክር እንኳ ሌሎች ግን ከበጎ ፈቃድ የተነሣ ክርስቶስን ይሰብኩታል፤
እነዚህ ወንጌልን መመከቻ ለማድረግ እንደ ተሾምሁ አውቀው በፍቅር ይሰብካሉ፥
እነዚያ ግን በእስራቴ ላይ መከራን ሊያመጡብኝ መስሎአቸው፥ ለወገናቸው የሚጠቅም ፈልገው በቅን አሳብ ሳይሆኑ ስለ ክርስቶስ ያወራሉ።
ምን አለ? ቢሆንም በሁሉ ጎዳና፥ በማመካኘት ቢሆን ወይም በቅንነት ቢሆን፥ ክርስቶስ ይሰበካል ስለዚህም ደስ ብሎኛል።”
እኔም እላለሁ፣ በማመካኘትም ቢሆን ወይም በቅንነት፣ ኢትዮጵያዊ አንድነት ይሰበካል በዚህም ደስ ይለኛል።

በፋሲል የናለም

የስብሀት ነጋ የሙስና ሚስጢር በጥቂቱ

ባአውን ሰሃት የሀገሪታ የብድር እዳ ወደ ትሪሊዮን የተጠጋ እንደሆነ የተነገረ ነው የነሱ ኪስ የወፈረ ደሃው የሀገሬ ህዝብ ግን የተራ ነው።
ለዛም ነው ህወሀት ወያኔ እስከመጨረሻው ከሀገራችን ጫንቃ ላይ መነቀል አለበት ብለን የምንታገለው።

በቀድሞው የአየር ሃይል ም/አዛዥ ጄነራል ሰለሞን እና በአሜሪካ በሲያትል እና በዋሽንግተን ዲሲ በሚኖሩ ስምንት የስብሃት የአጎት እና የአክስት ልጆች ስም በአክሲዮን ሽፋን የከፈቱት “ሉሲ አካዳሚ”ከሙስና የተገኘ ትልቅ የገቢ “ዘረፋ” ምንጭ ሆኖአል ።

አካዳሚው በገርጂ እና ሳር ቤት – ባለ ስድስት ፎቅ ህንጻ አቅፎአል። የፌደራል ፖሊስ ም/ኮሚሽነር ሃሰን ሺፋ በቦሌ ያስገነቡት ባለሁለት ቤት ቪላ ተጠናቆ በየወሩ 25 ሺህ ብር መከራየት ጀምሮአል።

የጄነራል ሳሞራ ቪላ ከለንደን ካፌ ፊት ለፊት ሲገኝ ከ1997 አመተ ምህረት ጀምሮ በየወሩ 30 ሺህ ብር ይከራያል። ባለ ሶስት ፎቅ የአባዱላ ቪላ ከሳሞራ ቪላ ቀጥሎ ሲገኝ ከሚያዚያ 97 አመተ ምህረት ጀምሮ በየወሩ 4 ሺህ ዶላር ለነጮች ይከራያል።

ቦሌ ኤርፖርት መግቢያ ከኖክ ማደያ ጀርባ የብርሃነ ገ/ክርስቶስ እና የአዲስአለም ባሌማ ተወዳዳሪ ያልተገኘለት ባለሶስት ፎቅ ምርጥ ቪላዎች ይገኛሉ።

በ1988 አመተ ምህረት የተገነቡት የሁለቱ ቪላ ሁለት የአሜሪካ ከፍተኛ መኮንኖች እያንዳንዳቸው በአራት አራት ሺህ ዶልር ተከራይተውታል። ከኢምፔሪያል ሆቴል አጠገብ የተገነባው እና በሰባት ሚሊዮን ብር ወጪ የተሰራው የተፈራ ዋልዋ ባለ ሦስት ፎቅ ቪላ በወር 30 ሺህ ብር መከራየት የጀመረው በ97 አመተ ምህረት መጨረሻ ነበር።

የሙስናው ዝርዝር እና ስፋት በጣም ሰፊ ነው ።ወደ ውጭ እየሸሸ የሚገኘው የሃገር እና ህዝብ ሃብት ሳይካተት ማለት ነው ።

ይህ ሁሉ ዘረፋና የሀገር ሀብት ላይ ጉዳት ያደረሱ የሙስና አባቶች ምንም ሳይሆኑ በድሀው የሀገራችን ህዝብና ሁሮ ላይ መከራ ይዘሩበታል ።
ባአውን ሰሃት የሀገሪታ የብድር እዳ ወደ ትሪሊዮን የተጠጋ እንደሆነ የተነገረ ነው የነሱ ኪስ የወፈረ ደሃው የሀገሬ ህዝብ ግን የተራ ነው።
ለዛም ነው ህወሀት ወያኔ እስከመጨረሻው ከሀገራችን ጫንቃ ላይ መነቀል አለበት ብለን የምንታገለው።

ምሥራቅ ሐረርጌ ጭናቅሰን ወረዳ ውስጥ ለአራት ቀናት ውጊያ ሲካሄድ እንደነበር የአካባቢው ምንጮች ገልፀዋል

ትናንት ካልማሌ፣ አምበሮ፣ ዋጩ፣ ለመፋ በተባሉ ቀበሌዎች ውስጥ ከጠዋቱ 11 ሰዓት አንስቶ ተኩስ መከፈቱና የአካባቢው ነዋሪም የመከላከል እርምጃ መውሰዱ ተነግሯል።

በሌላ በኩል ደግሞ የጉርሱም ወረዳ የፀጥታ ምክትል ኃላፊ የነበሩና አቶ መሐመድ አብዱራህማን የሚባሉ የቀድሞ አስተዳዳሪ አቶ ሰላን መሐመድ፣ እንዲሁም የኦሮምያ አድማ በታኝ ፖሊስ አባል የነበረ አብዱጀባር የሚባል ወጣት ወደ ሃረር እየተጓዙ ሣሉ ጥቃት አድራሾች ቦምባስ ከተማ ላይ ይዘዋቸው ያለፈውን ሌሊት እሥር ቤት ውስጥ ካሣደሯቸው በኋላ ሁለቱንም እንደገደሏቸው ተሰምቷል።

በተያያዘ ዜና የሶማሊ ልዩ ሃይል በኦሮሞ ህዝብ ላይ የሚፈጽምውን ግድያ በመቃወም በአወዳይ፣ ደደር፣ ቆቦ እና ጭናክሰን ከተሞች ከፍተኛ ተቃውሞ ተካሄዳል።

ወደ አዲስ አበባ፣ ጅጅጋ እና አጎራባች ከተሞች የሚሰሩ ተሽካርካሪዎች ስራ አቁመው እንደነበርም ተነግራል። በአወዳይ እስካሁን የመከላከያ ጂፕ መኪናን ጨምሮ 4 መኪኖች ተቃጥለዋል። ሃረርም ውጥረት አለ። የታጠቁ ወታደሮች በየስፍራው ሲንቀሳቀሱ ይታያል  ተብላል።

አመፁ አገሪቷን እያናወጥ ይገኛል

የአርበኞች ግንቦት 7፣ ለአንድነትና ለዴሞክራሲ ንቅናቄ፣ አንደኛ መደበኛ ጉባኤን በሚመለከት የወጣ መግለጫ

የአርበኞች ግንቦት 7፣ ለአንድነትና ለዴሞክራሲ ንቅናቄ፣ ከጳጉሜ 1 ቀን 2009 ዓ.ም ጀምሮ እስከ መስከረም 1 ቀን 2010 ዓ.ም ድረስ ባደረገው የመጀመሪያው ጉባኤ፣ የሀገራችንን ወቅታዊ የፖለቲካ፣ የኢኮኖሚ፣የማህበራዊ ሁኔታዎችንና በአሁኑ ሰዓት የሚትገኝበትን የደህንነት ስጋት በስፋትና በጥልቀት ፈትሿል። በፍተሻው ሀገራችን ኢትዮጵያ በረጅም ታሪኳ የገጠሟት እጅግ ፈታኝ ወቅቶች እንዳሉ አስታውሶ፤ በአሁኑ ወቅት የምትገኝበት ሁኔታ ግን ከዚህ በፊት ገጠሟት ከነበሩ አስቸጋሪ ሁኔታዎች ሁሉ እጅግ የከፋ እንደሆነ ጉባኤው ድምዳሜ ላይ ደርሷል። አገራችን አሁን ለደረሰችበት አሳዛኝ አደጋ ደረጃ ላይ ለመድረስ ዋነኛው ምክንያት ላለፉት 26 ዓመታት በወያኔ የበላይነት የተዘራው መርዛማ የዘር ፖለቲካ መሆኑን አረጋግጧል።
በአሁኑ ወቅት የወያኔ መርዛማ የዘር ፖለቲካ በተለያዩ የህብረተሰቡ ክፍሎች ውስጥ የዘራው የጠላትነት፣ የፍራቻና የጥርጣሬ ወረርሽኝ በራሱና የህወሀት/ኢህአዴግ ግንባር ድርጅቶች ውስጥ ጭምር ገብቶ፣ እርስ በእርስ በውስጥ ሽኩቻ እና የግንባር ድርጅቶቹ ደግሞ ከሌሎች የግንባር ድርጅቶች ጋር ወደ ጥፋት ጎዳና በፍጥነት በሚጓዝ የትንንቅ ሂደት ውስጥ ገብተዋል። የሀይለማሪያም ደሳለኝ አሻንጉሊት መንግስትም ለዚህ የጥፋት ሂደት፤ የአጋፋሪነት ሚናን በመጫወት ላይ ይገኛል። ይህ ሂደት በምን ሁኔታ ሊጠናቀቅ እንደሚችልና ሊያስከትል የሚችለውም እጅግ አስፈሪ ሀገራዊ ሁኔታ ጉባኤውን እጅግ አሳስቦታል።
በሀገሪችን ኢትዮጵያ ያለው የሽፍታ ኢኮኖሚ ወያኔን እና ለወያኔ ሥርዓት ያደሩ ጥቂት ሰዎችን በአጭር ጊዜ ውስጥ የከፍተኛ ሀብት ባለቤት ሲያደርግ አብዛኛውን የሀገሪቷን ዜጋ ደግሞ ለከፍተኛ ድህነትና ረሀብ አጋልጦታል። ለዘረፋ እንዲያመች የተዘረጋው የኢኮኖሚ ሥርዓት ምንም ዓይነት መጠበቂያ ስለሌለው፣ ልክ እንደ ፖለቲካው እርስ በእርሱ መደጋገፍ አቅቶት በአንድ በኩል በብዙ ሚሊዮኖች የሚቆጠሩ ዜጎችን በየጊዜው ለረሀብ ሲያጋልጥ፣ ትንሽም ቢሆን ተፍጨርጭሮ የሚኖረውን የህብረተሰብ ክፍል መሰረታዊ የፍጆታ እቃዎችን እንኳ መግዛትና መጠቀም ከማይችልበት የድህነት ወለል በታች እየወረደ መሆኑ ምን ዓይነት ሀገራዊ ቀውስ እያስከተለ እንደሆነ ጉባኤው ተገንዝቧል።
በህብረተሰቡ ውስጥ የነበረው ማህበራዊ ጥሪትና መተባበር ተሟጦ፣ በማንኛውም ማህበራዊ ግንኙነት ማንም ከማንም ጋር፣ በምንም ዓይነት ጉዳይ፣ በየትኛውም ደረጃ ተማምኖ፣ ምንም ዓይነት ማህበራዊ ግንኙነት ማድረግ ከማይችልበት ደረጃ ላይ ደርሷል። በአንጻሩ ያለመተማመን፣ አንዱ በሌላው ኪሳራ መበልጸግ፣ ሌብነት፣ ሸፍጥ፣ ክህደት፣ ብልጣብልጥነትን “የአዋቂነትና የትልቅነት መለኪያ”፣ የሚያስመስል አመለካከት ከቀን ወደ ቀን በማህበረሰቡ ውስጥ እየተንሰራፋ በመምጣቱ፣በሕዝቡና በሀገሪቷ ላይ እየደረሰ ያለው በቀላሉ የማይታከም በሽታ እየሆነ መምጣቱ ጉባኤውን እጅግ አሳስቦታል።
በአሁኑ ጊዜ በሀገሪቷ ያለው የደህንነት ዋስትና የማጣት ሁኔታ ለተራው ዜጋ ብቻ ሳይሆን ለሥርዓቱ ተጠቃሚ ሰዎች ጭምር ምንም ዓይነት ዋስትና ወደ ማይሰጥበት ደረጃ ላይ ደርሷል። ተራው ዜጋ ፣ ውሎ የመግባት፣ ሰርቶ የማግኘት፣ ለነገ የማሰብ፣ ዋስትና ማጣቱ እንዲህ ካለሥርዓት የሚጠበቅ ቢሆንም፣ ይህ የደህንነት ዋስትና ማጣት የደረሰበት ደረጃ የሥርዓቱንም ተጠቃሚዎች ሰለባ ማድረግ መጀመሩም በገሀድ እየታየ መጥቷል። የአንደኛው ተጠቃሚ ቡድን የሌላውን ቡድን ዓባላት ሰበብ አስባብ እየፈጠረ የሚያጠፋበት ሁኔታ ሥርዓቱ ወደ ለየለት የአራዊት ስርዓት እየወረደ መሆኑን የሚያሳዩ የአደባባይ ትዕይንቶች በተደጋጋሚ መታየት ከጀመሩም ውለው አድረዋል። የአግ7 ጉባኤ፣ የሥርዓቱ አውሬዎች እርስ በእርስ መበላላት ብዙም የሚያስጨንቀው ጉዳይ ባይሆንም፣ በዜጎች ላይ የሚያስከትለው ፈጽሞ የለየለት ሥርዓት ዓልባ ሁኔታ ግን በቀላሉ የሚገመት ሊሆን እንደማይችል ጉባኤው ለማየት ችሏል።
አርበኞች ግንቦት 7፣ ከዚህ በላይ ጉባኤው የተነጋገረባቸው እጅግ አንገብጋቢ አገራዊ ቀውሶች ከቁጥጥር ውጪ ከመሆናቸው በፊት ሊደረግ የሚገባውን አገር አድን እንቅስቃሴ በከፍተኛ ደረጃ መጨመር እንዳለበት በአንድ ልብ ተስማምቷል። ለዚህም እንቅስቃሴ መጨመር የሚያረጋግጠውን ግብ፣ ከግቡ የሚያደርሰውን ስትራቴጂ፣ ስትራቴጂውን የሚሸከም ድርጅታዊ አቅም፣ ድርጅቱን የሚመራ ብቃት ያለው አመራር የሚኖርበትን ሁኔታ፤ የጉባኤውን ሰፊ ጊዜ በመስጠት በአግባቡ ፈትሾ አስፈላጊውን ማሻሻያዎች እና ማስተካከያዎች አድርጓል። ቀጣዩም አገር አድን የትግል ትንቅንቅ ዘመን ውጤታማ እንዲሆን ጉባኤተኛው የሚቻለውን ሁሉ ለማድረግ ቃል ተገባብቷል፤ ይህም ሁኔታየጉባኤተኛውን መንፈስ በከፍተኛ ሁኔታ አድሶታል።
ከዚህም በመነሣት ለመላው ህዝባችንና አገራችን ያለቺበት እጅግ አደገኛ ሁኔታ ለሚያሳስበው የህብረተሰባችን ክፍል በሙሉ የሚከተለውን ጥሪ ማቅረብ ይፈልጋል።
ውድ የኢትዮጵያ ሕዝብ ሆይ!
በቀደምት ሥርዓቶች በደረሰብህ የፍትህ፣ የእኩልነትና የነጻነት እጦት፣ የሥልጣን ባለቤትነትህ ተክዶ በገዛ ሀገርህ እንደ ጠላት እጅግ ከፍተኛ ግፍና ሰቆቃ ሲደርስብህ ኖረሀል። በወያኔ የአገዛዝ ዘመን ግን በግፍ መኖር እራሱ ትልቅ ነገር ሆኖ፣ ሀገርም እንኳ ወደ ማይኖርህ ደረጃ እየወረደ በሚሄድ ሁኔታ ውስጥ ትገኛለህ። ንቅናቄያችን አርበኞች ግንቦት 7፣ ይህ የደረስንበት እጅግ አደገኛ ሀገራዊ ሁኔታ ላይ ለመድረስ የቻልነው፣ እስከ ዛሬ የነበሩ ሥርዓቶች፤ በሕዝብ ላይ የግፍ አገዛዝን በመጫን ሌላውን ዜጋ በማሰቃየት ሥራ የተጠመዱ ስለነበሩ እንደ ወያኔ ላለው ዘረኛና ዓምባገነን ቡድን መንገድ በመጥረጋቸው ነው ብሎ ያምናል። ከዚህ መሰረታዊ እውነታ በመነሳትም ነው ንቅናቄያችን በዋናነት፤ የሀገራችን ትንሳኤ የሚጀመረውና ተጠናክሮ የሚቀጥለው የሕዝብን የሥልጣን ባለቤትነት በሚያረጋግጠው ዴሞክራሲያዊ ሥርዓት ብቻ ነው የሚል መድምደሚያ ላይ የደረሰው። ስለሆነም፤ ንቅናቄያችን ሀገራችን ኢትዮጵያን ካንዣበበባት አደገኛ ሁኔታ የማዳንና የዴሞክራሲ ሥርዓትን በሀገራችን ለማስጀመር የጀመረውን እቅስቃሴ አጠናክሮ ለመቀጠል፣ እንዲሁም ጉባኤው የደረሰበትን ውሳኔዎች ተግባራዊ ለማድረግ በሚያደርገው ሕዝባዊ እቅስቃሴዎች፣ በምትችለው ሁሉ ከጎኑ እንድትቆም ጥሪውን ያቀርባል።
ህወሀት/ኢህአዴግን ለምትቃወሙ የፖለቲካ ድርጅቶች በሙሉ!
አርበኞች ግንቦት 7፣ ከዚህ ቀደምምባደረጋቸውም ሆነበእዚህ ጉባኤ በድጋሚ ያረጋገጠው፤ ንቅናቂያችን ለሥልጣን የሚታገል የፖለቲካ ፓርቲ ሳይሆን፤በሀገራችን ኢትዮጵያ ውስጥ፣ሥልጣን ሁሉም የፖለቲካ ድርጅቶች በዕኩልነት ተወዳድረው በሕዝበ-ውሳኔ የሚዳኙበትንሀገራዊ የፖለቲካ ስርዓት እንዲኖር ለማድረግ የሚሰራ መሆኑን ነው።በመሆኑም ከንቅናቄያችን ጋር በየትኛውም ደረጃ በጋራ በመንቀሳቀስ ሀገራችንን ከተጋረጠባት የጥፋት አደጋ አድነን ሕዝብ በዲሞክራሲያዊ ስርዓት ጥያቄዎቹን የሚፈታበትን ስርዓት በጋራ ዕውን እንድናደርግ የንቅናቄያችን ጉባኤ ልባዊ ጥሪውን ያቀርባል።
ለህወሀት (ኢሕአደግ) ግንባርና አጋር ድርጅቶች ዓባላት በሙሉ፣
በተለያዩ ምክንያቶች የወያኔ ከፋፋይ የዘውግ ፖለቲካ ለብሄሮች እኩልነት የሚሰራ መስሏችሁ ከወያኔ ጋር የተሰለፋችሁ ወገኖች፤ ውሎ እያደር በተግባር እንዳያችሁት ግን ህወሀት/ኢህአዴግ የሚተጋው ዘውጎች በእኩልነት እንዲኖሩ ሳይሆን፣በወያኔ አሽከርነት ሰጥ ለጥ ብለው እንዲገዙ ጫናውን ዕለት ከዕለት እየጨመረ መሆኑን በገሃድ እያያችሁነው። ይህ በማወቅም ሆነ ባለማወቅ እየተሳተፋችሁበት ያለው የአገዛዝ ሥርዓት፤ ወከልነው በምትሉት ሕዝብ ላይ እያደረሰ ያለውን የግድያ፣ የእስራት፣ የማፈናቀል፣ የማዋረድ፣ የማሸማቀቅ የግፍ ስርዓትና በዜጎች ላይ እያደረሰ ያለውን ሰቆቃ እና በአገር ላይ እያደረሰ ያለውን ውድመት ይብቃ ብላችሁ፣ ንቅናቄያችን በሚያካሂደው የአገር አድን እቅስቃሴ ውስጥ በሚቻላችሁ ደረጃ እና ሁኔታ ሁሉ በመሳተፍ ሀገራችንን በጋራ ለመታደግ እንድትሳተፉ ጉባኤያችን ወገናዊ ጥሪውን ያስተላልፋል።
ለኢትዮጵያ የመከላከያና የፖሊስ ሰራዊት ዓባላት በሙሉ፣
የወያኔ ዘረኛና አምባገነን ሥርዓት፤ እድሜውን የሚያራዝመው፣ መብቱንና ነጻነቱን ለማስከበር የሚታገለው ወገናችሁ ላይ በየጊዜውና በየቦታው አሰቃቂ ርምጃ እንድትወስዱ በማድረግ ሲሆን፣ በሌላው ጎኑ ይህ ሥርዓት ከአናቱ እየፈረሰ መሆኑ ደግሞ ከእናንተ የተሰወረ እንዳልሆነ ግልጽ ነው። በቅርብ የምታውቋቸው አለቆቻችሁ ከሲቪል አቻዎቻቸው ባልተናነሰ ሁኔታ በከፍተኛ ዘረፋ በተዘፈቁበት አጸያፊ ድርጊት ምን ያህል ሀብት እንዳካበቱ የአደባባይ ሚስጥር መሆኑን ታውቃላችሁ። ስለዚህ የእናንተ ከዚህ ከበሰበሰና ሊወድቅ እያዘመመ ካለ ሥርዓት ጋር መቆም፤ በሀገራችሁ እና በወገናችሁ ላይ ከሚያስከትለው ሰቆቃ በሻገር፤ እናንተም የስርዓቱ አሰቃቂ ርምጃዎች አስፈጻሚ እና ቀጥተኛ ተሳታፊ መሆናችሁ የተለየ ሀላፊነትን አሸክሟችኋል። በመሆኑም የወያኔን ያበቃለት የአገዛዝ ሥርዓት ዛሬውኑ ትታችሁ እና በሚቻላችሁ ሁሉ በሕዝብ ላይ የምታደርሱበትን ሰቆቃ አቁማችሁ፣ ከወገናችሁ ጎን እንድትቆሙና በምትችሉት አጋጣሚ ሁሉ ንቅናቄያችንን እያካሄደ ያለውን ትግል እንድታግዙ፤ ከተቻለም ንቅናቄያችንን እድትቀላቀሉ በራችን ክፍት መሆኑን ጉባኤያችን ያረጋግጥላችኋል።
በመጨረሻም፣ንቅናቄያችን አርበኞች ግንቦት 7፤ ከጳጉሜ 1 2009 ዓ.ም ጀምሮ እስከ ዛሬ መስከረም 1 2010 ዓ.ም ድረስ ባካሄደው መደበኛ ጉባኤ ባስተላለፈው ውሳኔዎች፣ አገራችን ኢትዮጵያ ሁላችንም በእኩልነት የምንኖርባት አገር ለማድረግና የሕዝብን የሥልጣን ባለቤትነት ለማረጋገጥ የሚደረገውን ትግል እስከ መጨረሻው በጽናት እንደሚገፋ ቃል ኪዳኑን አድሷል። በተጨማሪም ጉባኤው የንቅናቄያችንን ተልዕኮ ለማሳካት የሚያስፈልገውን የዴሞክራሲ ሥርዓት ሂደት እንዲጀመርና አገር የማዳኑም ትንቅንቅ ተጠናክሮ እንዲቀጥል የጀመረውን እንቅስቃሴ እስከዳር ለማድረስ የገባውን ቃል ኪዳን እንደገና በማደስ በዲሞክራሲያዊ ሂደትና በከፍተኛ ስኬት ጉባኤውን አከናውኗል። በያዝነው 2010ዓ.ም የአገራችንን ትንሳኤ በአስተማማኝ ደረጃ ለማስጀመር የሚያስፈልገውን ድርጅታዊ ሁኔታ ማመቻቸቱን ጉባኤው በድጋሚ ያረጋግጣል።
መልካም አዲስ ዓመት ለኢትዮጵያዊያን ወገኖቻችን በሙሉ!
አንድነት ሀይል ነው!!!
ድል ለኢትዮጵያ ሕዝብ!!!
አርበኞች ግንቦት 7፣ ለአንድነት ለዴሞክራሲ ንቅናቄ፣
መስከረም 1 ቀን 2010 ዓ.ም

%d bloggers like this: