ዳኞቹን ሳይቀር ያሳዘነ ትዕይንት በፍርድ ቤት ውሎ

በአማራ ክልል በነበረው ህዝባዊ ንቅናቄ ሰበብ የታሰሩትና በእነ ታደሰ መሸሻ አሰጌ ክስ መዝገብ ከተከሰሱት መካከል 3ኛ ተከሳሽ የሆነው ዮናስ ጋሻው ደመቀ በሌሎች የአማራ ወጣቶች የሚፈፀመው ጭካኔ ተፈፅሞበታል። አስቻለው ደሴና ሌሎች አማራ ወጣቶች እንዳደረጉት ሱሪውን በችሎት አውልቆ “ህዝብ ይፍረደኝ” ብሏል። ሃይላንድ ያንጠለጠሉበትን ብልቱን አሳይቷል።በዚህ ወቅት ታዳሚው አልቅሷል። ጓደኛዬ ይህን ሰቆቃ እያየ በደንብ መፃፍ አልቻለም። ዳኞች እንኳ አንገት ደፍተዋል። በጠዋቱ ችሎት በተከሳሹ ሰቆቃ ያለቀሱትን ታዳሚዎችም አነጋግሬያቸው ነበር። ከሰዓትም ሀዘኑ ሳይለቃቸው ስለ ሰቆቃው ነግረውኛል።

ዮናስ ማዕከላዊ በነበረበት ወቅት ሀይላንድ አንጠልጥለውበታል። በፒብሳ ከታትፈውታል። እግሩ ተጎድቷል። ማዕከላዊ በተፈፀመበት ሰቆቃ የነርቭ በሽተኛ ሆኗል። ይህን ሲናገር ሰቆቃውን ያደረሱበት ሁለት የማዕከላዊ ገራፊዎች ችሎት ውስጥ ተቀምጠው ነበር።

የጓደኛዬ ማስታወሻ አገላበጥኩ። ዮናስ የተበደለው ማዕከላዊ ብቻ አይደለም። ከመታሰሩ በፊትም በቤተሰቡ ላይ በደል ደርሶበታል። ” ወንድሜን ሆን ብለው በኦራል(መኪና) ገጭተው ገደሉት፣ እናቴንም በተመሳሳይ መልኩ ገድለውብኛል። በማዕከላዊ አማራና ኦሮሞ ዘር እንዳይተካ ለምን ይደረጋል? የተማርነው ጥላቻ ነው። የእኛ ትውልድ ከእኛ ምን ይማራል? ሀይላንድ ተንጠልጥሎብኛል። በፒንሳ…… ሁላችንም ጉዳት ደርሶብናል” ብሎ በችሎት ምሬቱን ተናግሯል።

የዮናስ ስቃይ ከማዕከላዊ በኋላም አላበቃም። በማዕከላዊ የደረሰበትን ጉዳት ለመታከም ወደ ዘውዲቱ ሆስፒታል ተወስዶ፣ ከአቅማችን በላይ ነው ብለውታል። ጳውሎስ ሄዶ የአጥንት ስብራት እንዳለበት ማረጋገጫ ቢሰጠውም ቂሊንጦ ማረሚያ ቤት ውጤቱን አጥፍቶበታል። በድብደባው ምክንያት የቀኝ እግሩ ሽባ ወደመሆን ደርሷል። ለዚህም ሽፍን ጫማ ያስፈልጋል። ሆኖም ሽፍን ጫማውን ገብረእግዚ የተባለ የገዥዎች ወገን ቀዶ ጥሎበታል። “ሽፍን ጫማ ለማድረግ እንኳ ብሔር መቀየር አለብን” ሲልም ገዥዎቹ እያደረሱበት ያለው በደልና ጭካኔ ቅጥ ጠይቋል።

ጠዋት ቀጠሮ የነበራቸው ተከሳሾች ጉዳይ ከሰዓትም ይቀጥላል ስለተባልን ከማህሌት ፋንታሁን ጋር ከሰዓት ወደ 19ኛ ወንጀል ችሎት አቀናን።ተከሳሾቹ ወደ ቂሊንጦ ሄደው ስለነበር ችሎት ስራ ይጀምራል ከተባለው ሰዓት ዘግይተው ደረሱ። ከሌሎች ተከሳሾች ቀደም ብሎ አንድ ተከሳሽ እያዘገመ ነው። በቀኝ ጎኑ በኩል ሌላ ተከሳሽ ደግፎታል። ወዲያውኑ ከኋላው የነበሩት ተከሳሾች አለፉትና ተደግፎ ከኋላ ማዝገም ጀመረ። በጠዋቱ የችሎት ጊዜ ሱሪውን አውልቆ የተፈፀመበትን በደል የተናገረው ተከሳሽ እንደሆነ መገመት ችያለሁ። ተከሳሾች ወደ ችሎት ከገቡ በኋላ እኛም ለመታደም ገባን። ተደግፎ ፍርድ ቤቱ ግቢ ውስጥ ወዳለው ጊዜያዊ ማቆያ ያቀናው ተከሳሽ ፊት ወንበር ላይ ተቀምጧል። የቀኝ እግሩ ለሚያየውና የደረሰበትን በደል ለሚገምት በሚሰቀጥጥ መልኩ ይንቀጠቀጣል። ተቀምጦ እንኳን በቀኝ እግሩ አይረግጥበትም። የቀኝ የሰውነት ክፍሉ እስከ ትክሻው ድረስ ይንዘፈዘፋል።ችሎቱ ስራ ላይ በነበረበት ሰዓት ለሽንት ተደግፎ ሲወጣ የቀኝ እግሩን በደንብ አይረግጥበትም። ይጎትተዋል ማለት ይቀላል።

የማዕከላዊ ምስክሮች

ከሰዓት በነበረው የፍርድ ቤቱ ሰዓት ሁለት የዐቃቤ ሕግ ምስክሮች ተሰምተዋል። በቀዳሚነት የተመሰከረበት ደግሞ ሰቆቃ የተፈፀመበት ዮናስ ነው። ምስክሩ ባህርዳር ከተማ ይኖር የነበር ደላላ እና የሆቴል ባለቤት ነኝ አለ። አሁን ተፈትቼ ባህርዳር እገኛለሁ ብሎ ቃሉን ሰጠ። እውነታው ግን ሌላ ነው። ዮናስ ጋሻው ወደ ግንቦት 7 እንድልከው ጠይቆኝ ነበር ብሎ መሰከረ። ቆይቶ ደግሞ የአማራ ሕዝብ ነፃነት ንቅናቄ (አሕነን) የተባለ፣ የግንቦት 7 ቅርንጫፍ ነው ያሉት ቡድን እንዲቀላቀል በአንድ ስብሰባ እንደተነገረው፣ ከምሽቱ 12 ሰዓት ተሰብስው ማታው መንግስትን ለመገልበጥ ጦርነት ሊያደርጉ፣ ምስክሩም አባል እንዲሆን በተነገረው በነጋታው በተነገረው ጦር አደራጅቶ አባይን ሊያስዘጋ ተልዕኮ እንደተሰጠው መሰከረ። ምስክሩ መረጋጋት አይስተዋልበትም። የሚሰጠው መልስ ይበቃል እየተባለ እንኳን ማብራሪያውን ይቀጥላል። ዐቃቤ ሕግ፣ ፍርድ ቤቱም፣ የተከሳሾች ጠበቃም “በቃ” እያሉት አይበቃውም።

ፍርድ ቤቱ በመሃል እየገባ “ወደ ግንቦት 7 ለመሄድ የሚጠየቁት ምን ሰለሆኑ ነው? ወደ ግንቦት 7 እንዲልኩት ሲጠይቅ የነበረ ሰው እንዴት የግንቦት 7 ቅርንጫፍ ነው የተባለ ቡድን መስርቶ እንዲቀላቀሉ ይጠይቅዎታል? በአንድ ቀን ዝግጅት እንዴት ጦርነት ይደረጋል? አንድ ቀን ተነግሮዎት ያለ ዝግጅት እንዴት አባይን ያስዘጋሉ? ማን ጋር ሆነው አገኙት?……” ብዙ ብዙ ጥያቄ አነሳ። 19ኛ ወንጀል ችሎት ዳኞች አንድ ቀን በማጣሪያ ጥያቄ ምስክርን አጥብቀው ሲጠይቁ አይቻለሁ። ዶ/ር መረራ ጉዲና ሲመሰከርባቸው። እንደዛሬው ምስክርነት ግን ግራ ሲጋቡ፣ ግራ የተጋቡበትን የምስክርነት ቃል ለተከሳሽ የሚጠቅም በሚመስል መልኩ ሲጠይቁ አይቼ አላውቅም። ምን አልባት፣ ጠዋቱ የፍርድ ቤቱ ሰዓት የተነገረው ተፅዕኖ ፈጥሮ ይሆናል።

ተከሳሾች በጠበቃ አለልኝ ምህረቱ በኩል ምስክሮቹ ማዕከላዊ ታስረው እንደነበር፣ ተገደው እንደመሰከሩ፣ በድብደባ ብዛት “ልንመሰክርባችሁ ነው” ብለው ለተከሳሾች እንደነገሯቸው ጠየቁ፣ ዳኞችም አጣሩ። አንደኛው ምስክር “ሁላችንም ከምንታሰር የተወሰንነው ለቤተሰብ እንድረስ ብያቸዋለሁ” ብሎ አመነ። በጠበቃና በዳኞች ጥያቄ ብዛት ሌላኛው ምስክርም “መንግስት ምህረት ያደረገልኝ በእነሱ ላይ እመሰክራለሁ ስላልኩ ነው” ብሎ የማዕከላዊ ምስክር መሆኑን ተናገረ። ስልክ ስለመደዋወል ሲመሰክር የነበረው አንድ ምስክር “አሁን ስልክ የት አለ?” ሲባል “አልጋ የያዝኩበት ሆቴል አስቀምጨቃለሁ” ብሎ ተናገረ። ስልክ ቁጥሩን ሲጠየቅም “092 352 9019” ብሎ ተናገረ። ከችሎት እንደወጣሁ በዚህ ቁጥር ላይ ደወልኩ። ከቴሌ የድምፅ መልዕክት “ይህ ቁጥር አይታወቅም……” የሚል መልስ አገኘሁ። እኔ ስታሰር የተወሰደብኝ ስልክ ቁጥር አልተመለሰልኝም። ሁ በእኔ ቁጥር ላይም ስደውል የሚሰጠኝ መልስ ተመሳሳይ ስለሆነ ይህ ምስክር አሁን እጠቀምበታለሁ ያለው ስልክ ሲታሰር ተወስዶበት ቴሌ ቁጥሩን እንዳልለመለሰለት ግልፅ ሆነልኝ። እሱ ግን እጠቀምበታለሁ ብሎ መስክሯል። የማዕከላዊ ምስክር ከዚህ ውጭ ይላል ተብሎ አይጠበቅም።

ምስክሮቹ በዳኞችና በጠበቃ አለልኝ ምህረቱ ሲጠየቁ ” በምህረት ተፈትተናል” ብለዋል። የተፈቱበትን ቀን፣ ወርም ሲጠየቁ መልሳቸው “አናስታውስም” ነው። አልተፈቱምና የተፈቱበትን ቀን ሊያስታውሱ አይችሉም!

ተከሳሾቹም ምስክሮቹ ማዕከላዊ ታስረው እንደሚገኙ፣በእነሱ ላይ በሀሰት መስክረው እንደሚለቀቁ ቃል ተገብቶላቸው በሀሰት እንደሚመሰክሩባቸው ተናግረዋል። ሰቆቃ ደርሶበት ሱሪውን በችሎት አውልቆ ሀይላንድ የተንጠለጠለበትን ብልቱን ያሳየው ዮናስም በጠዋቱ ችሎት ምስክሮቹ ማዕከላዊ ታስረው፣ በግድ መስክሩ እየተባሉ እንደሆነ ተናግሮ ነበር። እውነታውም ይሄው ነው!

ሁለቱ ምስክሮች መስክረው ችሎት ተጠናቅቆ ስንወጣ የገቡት ወደ ማዕከላዊ ወንጀል ምርመራ መኪና ነበር። እስረኞች ወደሚመላለሱበት፣ እኔም በአንድ ወቅት የማዕከላዊ እስረኛ ሆኜ ወደተመላለስኩበት መኩና እንጅ አልጋ ወደያዙበት ሆቴል የሚያደርሳቸው መኪና ውስጥ አልገቡም። ጉዟቸው ጓደኞቻቸው ወደተሰቃዩበት፣ እነሱም ተሰቃይተው በሀሰት እንዲመሰክሩ ወደተገደዱበት ወደ ማዕከላዊ ነው። ዮናስ አካሉን ወዳጣበት፣ ብልቱ ላይ ውሃ ወደተንጠለጠለበት፣ ኢህአዴግ ደርግ ሲጠቀምበት ነበር ብሎ 26 አመት ሙሉ አማራ እና ኦሮሞ ወጣቶችን ወደሚያሰቃይበት ማዕከላዊ! ምስክሮች የሄዱት ተፈትተን እንኖርበታለን ወዳሉት አማራ ክልል ሳይሆን ትህነግ/ህወሓት የአማራ ወጣቶችን ብልት ወደሚሰልብበት፣ የትህነግ የጥላቻ ጥግ ወደሚታይበት ማዕከላዊ ወንጀል ምርመራ!

በጌታቸው ሽፈራው

Advertisements

የደህንነት አላፊው ጌታቸው አሰፋ አሜሪካንን ማስጠንቀቁ አነጋጋሪ ሆንዋል

የደህንነት(የሰቆቃ) መስሪያ ቤት ዳይሬክተር፡ ገዳይ አስገዳይ፡ ገራፊ፡ አስገራፊ፡ የለየለት ጨካኝ። መልኩ ቀይ፡ ልቡ ጥቁር፡ ባህሪው ልስልስ፡ ተግባሩ እርኩስ፡ ድምጹ የማይሰማ፡ የጭካኔው ወሰን በኢትዮጵያ ምድር ጫፍ እስከጫፍ የደረሰ ፍጹም አረመኔ ሰው ነው። በቴሌቪዥን መስኮት ታይቶ አይታወቅም። የአደባባይ ሰው አይደለም። መድረክ፡ ስብሰባ ላይ አይታይም። ቢኖር እንኳን በፎቶና በቪዲዮ ራዳር ውስጥ እንዳይገባ ይደረጋል። እናቶቻችን ‘ቀትረ ቀላል፡ ጥላቢስ፡’ የሚሉት ዓይነት ሰው ነው የሰቆቃና ቶርቸር ዳይሬክተር ጄነራል
ጌታቸው አሰፋ።

ማዕከላዊን ረገጠው ህይወታቸው ሳያልፍ የወጡ እድለኛ ታሳሪዎች በአንድ ቃል እንደሚናገሩት ሰቆቃ፡ ግርፋት፡ ግድያ፡ የሚፈጸሙት ትግርኛ በሚናገሩ ሰዎች ነው። የእነዚህ ሰዎች አለቃ፡ መሪ ደግሞ ይህ ሰው ነው ጌታቸው አሰፋ።

ኢትዮጵያ ውስጥ ባለፉት 15 ዓመታት በተፈጸሙት ፖለቲካዊ ሰቆቃዎች፡ ግድያዎች፡ እስሮች፡ውስጥ ይህ ሰው ዋናው ተዋናይ ነው። ይህ ሰው የስንቱን የኢትዮጵያ ልጅ የቀን ብርሃን አጨልሟል፡፡ የስንቱን ወጣት ተስፋ ቀጥፏል፡፡ አያሌ ህጻናትን ያለአባት፡ ያለእናት አስቀርቷል። ስንቱን ቤተሰብ በትኗል።

ይህ ሰው ማዕከላዊ ሌሊቱን ሲገርፍ ሲያስገርፍ፡ ያድራል፡ ሲደክመው ዋሽንግተን ዲሲ መጥቶ ውስኪውን ይጎነጫል። የኢትዮጵያን ወጣት ዘቅዝቆ፡ በርበሬ እያጠነ፡ በሽንት የተነከረ ጨርቅ እያጎረሰ ወፌ ላላ እየሰቀለ፡ ብልት እያኮላሸ ሲያሰቃይ ይቆይና ለእረፍት ጣሊያን ሲሲሊያ የባህር ዳርቻ በረር ብሎ ይንፈላሰሳል።

ድንቁርናው አይጣል ነው። በዊኪሊክስ እንደተጋለጠው ከሆነ ይህ ሰው አሜሪካንን አስፈራርቷል። ያማማቶ ለተባሉ የአሜሪካ አምባሳደር ”አሜሪካ የእኛን ተቃዋሚዎች መርዳት የማታቆም ከሆነ እኛም ለአሜሪካን ተቃዋሚዎች ድጋፍ እናደርጋለን” ማለቱን ዊክሊክስ አስነብቦናል።

ህወሀት የአድዋን ስረወ መንግስት በሰየመበት በሰሞንኛው መድረክ ይህን ሰው ዳግም ከፍ ያለ ቦታ ሰጥቶታል። መልዕክቱ ግልጽ ነው። ለውጥ የለም። የነበረው ተጠናክሮ ይቀጥላል ነው። የኢትዮጵያን ህዝብ ቀጥቅጠን፡ ረግጠን እያኮላሸን፡ በኤሊክትሪክ ሽቦ ጡት እየተለተልን በጉልበትና በሃይል እንቀጥላለን የሚል መልዕክት መሆኑ ይገባናል። ህወሀት ተውሳኩን አስወግጄ መጣሁ፡ ታድሼ፡ ተወልውዬ በአዲስ መንፈስ ለለውጥ ተነሳሁ ያለው ይህን የዲያቢሎስ ቁራጭ፡ የሳጥናኤል ወንድም፡ ክፉና ነውረኛ ሰው ከስልጣን ማማ ላይ አስቀምጦ ነው።

ይህ ሰው በሰው ልጅ ላይ በፈጸመው ወንጀል፡ በዘር ማጥፋት፡ ወደር በሌለው የሰቆቃ ተግባሩ እጁ ወደ ኋላ ተጠርንፎ በፍትህ አደባባይ ቅጣቱን ማግኘት የሚገባው ሰው ነበር። ደግሞም አይቀርም። ይዘገይ እንደሁ እንጂ ፍትህ ይመጣል።

የአማራ ክልል ጠቅላይ ፍ/ቤት የፌደራል ከፍተኛ ፍ/ቤት ስልጣን የለውም ተባለ

በጌታቸው ሺፈራው
የፌደራል ከፍተኛ ፍርድ ቤት ልደታ ምድብ 4ኛ ወንጀል ችሎት የአማራ ክልል ጠቅላይ ፍርድ ቤት የከፍተኛ ፍርድ ቤት ስልጣኑን አጥቷል ሲል ብይን ሰጥቷል። ጥቅምት 23/2010 በእነ ብርሃኑ ሙሉ እና ነጋ የኔው ክስ መዝገብ ስር ክስ የተመሰረተባቸው ተከሳሾች ወንጀሉን ፈፀሙት የተባለው በአማራ ክልል በመሆኑ በወንጀለኛ ወቅጫ ህግ ስ/ስ/ቁ 99 እና 100 መሰረት ወንጀሉ ተፈፀመበት በተባለው ቦታ ክሱ ሊታይ እንደሚገባ ባቀረቡት የክስ መቃወሚያ ፍርድ ቤቱ የአማራ ጠቅላይ ፍርድ ቤት የፌደራል ከፍተኛ ፍርድ ቤት ስልጣንን ስላጣ ጉዳዩን ሊያይ አይችልም ሲል በአብላጫ ድምፅ በይኗል።
ፍርድ ቤቱ የክልል ፍርድ ቤቶች የፌደራል ፍርድ ቤት ስልጣን የተሰጣቸው ኢትዮጵያ በአህዳዊ መንግስት ትተዳደር በነበረችበት ወቅት እንደነበር፣ በአሁኑ ወቅት ኢትዮጵያ የምትተዳደረው በፌደራል ስርዓት ስለሆነ የስነ ስርዓት ህጉ ተፈፃሚ አይሆንም ሲል በአብላጫ ድምፅ ወስኗል።
ፍርድ ቤቱ በአብላጫ ድምፁ የህገ መንግስቱ አንቀፅ 78 ለክልል ፍርድ ቤቶች የፌደራል ስልጣን የሰጣቸው በህዝብ ተወካዮች ምክር ቤት በ2/3ኛ ድምፅ በክልሎች የፌደራል ፍርድ ቤት እስኪቋቋም ብቻ መሆኑን ገልፆአል።
በአዋጅ ቁጥር 322/95 መሰረት በጋምቤላ፣ ቤንሻንጉል፣አፋር፣ ሶማሊና ደቡብ ህዝቦች ክልየፌደራል ፍርድ ቤቶች ስለተቋቋሙ የአማራ ክልል ጠቅላይ ፍርድ ቤት በዚህ ወቅት የፌደራል ፍርድ ቤት ስልጣኑን አጥቷል የሚል ብይን ተሰጥቷል። የችሎቱ የማህል ዳኛ በአምስት ክልሎች የፌደራል ፍርድ ቤት መቋቋሙ የሌሎች ክልሎችን የፌደራል ፍርድ ቤቶች ስልጣን አያስቀርም በማለት የልዩነት ድምፅቸውን አስመዝግበዋል።
የአማራ ጠቅላይ ፍርድ ቤት የፌደራል ከፍተኛ ፍርድ ቤት ልደታ ምድብ 4ኛ ወንጀል ችሎት ከሰጠው ብይን በተቃራኒ ለፌደራል ከፍተኛ ፍርድ ቤት የተሰጡ ጉዳዮች እየዳኘ የሚገኝ ሲሆን በአብነትም የኮለኔል ደመቀ ዘውዱን ጨምሮ የ”ሽብር” ክስ የቀረበባቸውን ሌሎች ተከሳሾች ጉዳይ እያየ ይገኛል። በኦነግና ግንቦት ሰባት ክስ ቀርቦባቸው ወንጀሉ ተፈፀመበት በተባለባቸው ክልሎች እንዲታይ ያቀረቡት ተቃውሞ ውድቅ ሲደረግ የቆየ ቢሆንም ተከሳሾችና ጠበቆቻቸው የፍርድ ቤቶቹ ብይን ከህገ መንግስቱ የሚቃረን መሆኑን በመግለፅ ቅሬታቸውን ሲያቀርቡ ቆይተዋል።
የተከሳሾቹ ጠበቃ አቶ አለልኝ ምህረቱ ” ዛሬ የሰማሁት ብይን በባህሪው እንግዳ ነው። የአማራ ክልል ጠቅላይ ፍርድ ቤት ፌደራል ከፍተኛ ፍርድ ቤትን ስልጣን አጥቷል መባሉ የህግ ባለሙያዎችን ሊያነጋግር የሚችል ጉዳይ ነው” ብለዋል። ጠበቃ አለልኝ በብይኑ ስለማይስማሙም ለሚመለከተው ፍርድ ቤት ይግባኝ ለማቅረብ እንዳሰቡ ገልፀውልኛል።
እነ ብርሃኑ ሙሉ እና እነ ነጋ የኔው በቀረባቸው ክስ ላይ ያቀረቡት ሁሉም መቃወሚያ ውድቅ ተደርጎ አቃቤ ህግ የጠቀሰባቸውን የሰው ምስክር ለመስማት ለህዳር 20/2010 ቀጠሮ ተይዟል። አቶ ነጋ የኔው የወልቃይት ህዝብ አማራ ማንነት ጥያቄ ኮሚቴ አባል እንደነበሩ የ ተገለፀ ሲሆን ጎንደር ከተማ ውስጥ ጥቃት ፈፅማችኋል ተብለው ተከሰዋል።

ወያኔ ኢህአዴግ ለመለወጥ ዝግጁ አለመሆኑን ባወጣው መግለጫ ማረጋገጡ ተነገረ

ኢህአዴግ፣ ምንም ዓይነት የመለወጥ ተነሳሽነት እንደሌለው አረጋገጠ፡፡ ፓርቲው ቅዳሜ እና እሁድ የስራ አስፈጻሚ ኮሚቴ ስብሰባ ያካሔደ ሲሆን፣ በስብሰባው ላይም ከዚህ ቀደም የተለመዱትን ቃላት ከመደጋገም ውጭ፣ የህዝቡን ጥያቄ የሚመልስ ተነሳሽነት አለመታየቱ ታውቋል፡፡ ሀገሪቱ በከባድ ውጥረት ውስጥ በምትገኝበት በዚህ ሰዓት እንኳን ቆም ብሎ በማሰብ ፖለቲካዊ መፍትኤ መፈለግ ሲገባው፣ ጭራሽ የጠነዛ የፖለቲካ ፕሮፓጋንዳውን በመግለጫ መልክ ማውጣቱ እጅግ እንደሚያሳፍር የድርጅቱን መግለጫ የተከታተሉ ታዛቢዎች ተናግረዋል፡፡

‹‹ዴሞክራሲያችን ገና ለጋ ነው፤ በሀገሪቱ የተከሰተው ግጭት እና ተቃውሞ የኪራይ ሰብሳቢዎች ሴራ ነው›› በሚሉ አሰልቺ ቃላት የተሞላው የገዥው ፓርቲ መግለጫ፣ ለህዝብ ጥያቄ እና ለሀገሪቱ ህልውና ደንታ የሌለው ሆኖ እንዳገኙት የሚናገሩት ታዛቢዎች፣ ፓርቲው ራሱን እያታለለ እንደሚገኝ ካወጣው መግለጫ መረዳታቸውን አክለው ተናግረዋል፡፡ አለበለዚያማ ሲሉ አስተያየታቸውን የቀጠሉት ታዛቢዎቹ፣ ‹‹… የሀገር ጉዳይ ቢያሳስበው እንዲህ ያለ መፍትኤ አልባ መግለጫ አያወጣም ነበር!›› ሲሉም አስተያየታቸውን ያጠናክራሉ፡፡


የኢትዮጵያ ህዝብ ጥያቄ በአግባቡ ተመልሶ ሀገሪቱ ዳግም በሁለት እግሯ እንድትቆም ፖለቲካዊ መፍትኤ ማፈላለግ ሲገባ፣ በተቃራኒው ፓርቲው በኦሮሚያ እና በሌሎች አካባቢዎች ለሰላማዊ ሰልፍ የወጡ ዜጎች ላይ ግድያ የፈጸሙ የጸጥታ አካላትን አመስግኗል፡፡ የንጹኃንን ህይወት በመቅጠፍ ከፍተኛ ጉዳት ያደረሱትን የጸጥታ አካላት፣ ‹‹ከፍተኛ እልቂት እንዳይከሰት ስላደረጋችሁ እናመሰግናለን፡፡›› ሲልም አሹፏል – ኢህአዴግ፡፡

የፓርቲው የስራ አስፈጻሚ ከሚቴ አባላት ቅዳሜ እና እሁድ አስቸኳይ ስብሰባ ያደረጉት በሀገሪቱ ወቅታዊ ጉዳዮች ላይ ለመምከር ነው ቢባልም፤ ያወጡት መግለጫ ግን ላለፉት በርካታ ዓመታት ህዝብን ያደነቆሩበት እና ምንም አዲስ ነገር ያልታከለበት እንደሆነ አስተያየት ሰጪዎች ይናገራሉ፡፡

 

በአዲስ አበባ የሚገኘው የአሜሪካ ኤምባሲ ኢትዮጵያ ውስጥ በቅርቡ የተደረጉ የተቃውሞ ሰልፎች ግጭትና ግድያ ማስተናገዳቸው እንዳሳዘኑት ገለጸ

በአዲስ አበባ የሚገኘው የአሜሪካ ኤምባሲ ኢትዮጵያ ውስጥ በቅርቡ የተደረጉ የተቃውሞ ሰልፎች ግጭትና ግድያ ማስተናገዳቸው እንዳሳዘኑት ገለጸ፡፡

ኤምባሲው ደረሰኝ ያለውን ዘገባ ጠቅሶ እንዳስታወቀው በግድያ እና ግጭቱ ተጠያቂዎችን ለመለየት ግልጽ ምርመራ መደረግ እንደሚገባው ሁኔታው ያመለክታል፡፡

ዩናይትድ ስቴትስ ሰላማዊ ሰልፎችን የምትመለከተው እንደ ህጋዊ የሀሳብ እና የፖለቲካ ተሳትፎ መግለጫ እንደሆነ ኤምባሲው ዛሬ ያወጣው መግለጫ ያትታል፡፡

በቅርቡ በተካሄዱ በርከት ባሉ ሰልፎች ሰልፈኞች በሰላማዊ ሁኔታ ሀሳባቸውን መግለጻቸውን እና ይህን እንዲያደርጉም የጸጥታ ኃይሎች መታገሳቸውን በአድናቆት እንደሚመለከተው ኤምባሲው ገልጿል፡፡

ኤምባሲው ሁሉም ኢትዮጵያውያን አመለካከታቸውን በሰላማዊ መንገድ መግለጻቸውን እንዲቀጥሉ አበረታቷል፡፡ ባለስልጣናትም ይህንኑ አንዲፈቅዱ ጠይቋል፡፡ በጥቅሉም «ኢትዮጵያዊያንን በሚጠቅም ጉዳይ ገንቢ፣ ሰላማዊ፣ ሁሉን አካታች ብሔራዊ ተዋስዖ» መኖሩን እንደሚደግፍም በመግለጫው ጠቅሷል፡፡

The United States sees peaceful demonstrations as a legitimate means of expression and political participation.  We note with appreciation a number of recent events during which demonstrators expressed themselves peacefully, and during which security forces exercised restraint in allowing them to do so.

We are saddened by reports that several recent protests ended in violence and deaths.  All such reports merit transparent investigation that allows those responsible for violence to be held accountable.

We encourage all Ethiopians to continue to express their views peacefully, and encourage Ethiopian authorities to permit peaceful expression of views.  More generally, we encourage constructive, peaceful, and inclusive national discourse on matters of importance to Ethiopian citizens.

%d bloggers like this: