የህወሃት ደህንነቶች በሱዳን ኢትዮጵያውያኑን አርበኞች ግንቦት ሰባት እንዲሰልሉ እያስገደዱ ነዉ

ህዝባዊ ተቃውሞዎች በሀገሪቱ ዉስጥ ከተነሱበት ጊዜ ጀምሮ የህወሃት ደህንነቶች በሱዳን ውስጥ በሚገኙት 12 የስደተኞች ካምፖች ዉስጥ በመዘዋወር እና ኢትዮጵያውያኑን በግል በማስጠራት፤ አርበኞች ግንቦት ሰባት በሱዳን ከተሞች ውስጥም በስፋት እየተንቀሳቀሰ በመሆኑ፤ አባለቱን በመሰለል እና በመጠቆም ትብብር የማታደርጉ ከሆነ እናንተንም ከአሸባሪ ለይተን አናያችሁም በማለት የማያውቁትን ነገር እንዲናገሩ እየተገደዱ መሆናቸውን ስደተኞቹ ተናግረዋል።


በሱዳን ካምፖች ውስጥ የሚኖሩና በብዙ ሺዎች የሚቆጠሩ ኢትዮጵያውያን ስደተኞች የህውሃት አገዛዝ ስለላዎችን በማካሄድ አብረውት እንዲሰሩ፣ ካለበለዚያ እንደሚታሰሩና እንደሚደበደቡ በማስጠንቀቅ ስደተኞችን በማጉላላት ላይ መሆኑን ከስፍራዉ የደረሰን ጥቆማ አመለከተ።

የህወሃት ደህንነቶች ስደተኞቹን በመሰብሰብና የስለላ ስልጠናዎችን በግዳጅ በመስጠት ግማሾቹን እዛው ሱዳን ውስጥ ተበታትነው በከተሞች ውስጥ የሚኖረውን ስደተኛ በማዋራት እና ጥያቄዎችን በመጠየቅ የአርበኞች ግንቦት 7 አስተሳሰብ የሚስተዋልባቸውን እና ህወሀትን የሚቃወሙትን እንዲጠቁሙ፤ እንዲሁም ግማሾቹ ወደ ትግል የሚቀላቀሉ መስለው በሱዳን በኩል ወደ ኤርትራ በመግባት ስለላዎችን ሲያደረጉ ቆይተው ከተወሰኑ ወራቶች በኋላ ተመልሰዉ በመውጣት ኤርትራ ውስጥ ያለውን የአርበኞች ግንቦት ሰባት እንቅስቃሴ በማጥላላት ለሚዲያ ፍጆታ እንዲውሉ የሚያደርግ ስልጠና መሆኑን ተናግረዋል።

ከወራት በፊት ወደ ኤርትራ አምስት ስደተኞች ለስለላ ተልከው በዚያው በመቅረታቸዉ ደህንነቶቹ በሱዳን ካሰማሩዋቸው ሌሎች ስደተኞች ውስጥ የተወሰኑትን በመያዝ እዛው ሱዳን ውስጥ በሚገኝ ማሰቃያ እስር ቤት ውስጥ በማስገባት አሰቃቂ ድብደባዎች እንደፈጸሙባቸምም ተናግረዋል። ከዛ በኋላ ወደ ኤርትራ የሚላኩ ስደተኛ ሰላዮችን የራሳቸው ከሆነ ታማኝ ግለሰብ ጋር መላክ መጀመራቸውንም ጠቅሰዋል።

አክለውም ባለፈዉ ሳምንት ወደ 10 የሚጠጉ ስደተኞችን ለስለላ ወደ ኤርትራ እንዲሄዱ ፈቃደኝነታቸውን ተጠይቀው ብዙም ሳያቅማሙ ፈቃደኛ በመሆናቸው ምክንያት ብትሄዱ እንደምትቀሩ ታስታውቃላችሁ ተብለው በእስር ቤት በስቃይ ላይ እንደሚገኙም ገልፀዋል።

በአማራ ክልል በአሁኑ ወቅት ባለው አለመረጋጋት እና በኑሮ ውድነት ምክንያት ወደ ሱዳን የሚጎርፈው ህዝብ ብዛት ቀን ተቀን እየጨመረ መምጣቱን እና ያንን ተከትሎም ህወሓት በርካታ ደህንነቶችን በተለይ ወደ ካርቱም በማስገባቱ ከተማዋ ከመጨናነቋ በተጨማሪ በየመንገዱ ኢትዮጵያውያን የሚደበደቡባት እና ወደ እስር ቤት የሚጋዙባት ሆናለችም ተብሏል።

የህወሃት አገዛዝ የሀገር ውስጡ አልበቃዉ ብሎ በካርቱም ዙሪያ በሚገኙ ከተሞች ውስጥ እስር ቤቶች እንዲሰሩ ከሱዳን መንግስት ጋር እየተስማሙ እንደሆነም መረጃዎች አመልክተዋል።

 

ጥቂት ስለአርበኞች ግንቦት 7 ተዋጊ አርበኛ ሃና – ከጋዜጠኛ መሳይ መኮንን

የማህሌትንና የኤዶምን ከህወሀት ማጎሪያ እስር ቤት ነጻ መሆን ውስጤ የፈጠረውን ደስታ እያጣጣምኩ እያለ ድንገት በትዝታ አምስት ወራት ወደ ሁዋላ ሄድኩኝ- -ከኤርትራ በረሃ:: ይህቺን ኢትዮጵያን ከህወሀት እስር ቤት ነጻ ለማውጣት ብረት ያነሳችውን እህታችንን ላስተዋውቃችሁ::
አርበኛ ሀና ትባላለች:: የ23 ዓመት ወጣት ናት:: የአርበኞች ግንቦት 7 ተዋጊ ወታደር ስትሆን በተለያዩ አውደ ውጊያዎች ተሳትፋለች:: በኤርትራ በረሃ ስማቸው ከጀግንነት ጋር ከሚነሳላቸው አርበኞች መሃል ሀና ግንባር ቀደም ናት:: ስሟ በአርበኞች መንደር ገኖ ይነሳል::
………አንድ ጊዜ ላይ እንዲህ ሆነ::

ሀና የምትገኝበት ወታደራዊ ክፍል ግዳጅ ይሰጠዋል:: እስከ 30 የሚጠጋ አርበኛ የሚገኝበት ይህ ቡድን የኢትዮጵያን ድንበር አቋርጦ በመግባት በአንድ የህወሀት ወታደራዊ ካምፕ ላይ ጥቃት ፈጽሞ የመመለስ ግዳጅ ተሰጥቶት ይሰማራል:: ሀና መትረየሷን ታጥቃለች:: ጠዋት ከመነሻቸው ወደ ኢላማ ቦታው ገሰገሱ:: እንደታቀደው ድንገተኛ ጥቃቱ ተሰንዝሮ የታሰበውን ጉዳት አድርሰው ወደ ካምፓቸው ሊመለሱ እያለ ድንገት በህወሀት ሰራዊት ይከበባሉ:: ምን ይደረግ? ብዙ ቁጥር ያለውንና እስከአፍንጫው የታጠቀውን የህወሀት ሰራዊት መክቶ ወደ ካምፕ መመለስ ከባድ ሆነ:: የዚህን ጊዜ ነበር አንድ ጀግና ታሪክ የሰራችው:: ….ሀና::

መትረየሷን መተረች:: ገዢ መሬት ያዘች:: ቦታዋን አስተካከለች:: ….እሷ መስዋዕት ሆና የትግል ጓዶቿን ልታስመልጥ ወሰነች:: ምሽት እየመጣ ነው:: ጓዶቿ ተስናበቷት:: ዳግም በህይወት እንደማያገኟት ታወቃቸው:: …እሷ መትረየሷን ወደ ህወሀት ሰራዊት ለቀቀችው:: ለጓዶቿ ሽፋን በሚሰጥ ስልት አስካካችው:: …ፍልሚያው በአንዲት ሀና እና በህወሀት ሰራዊት መሃል ሆነ:: የሀና መትረየስ ያስካካል:: ጓዶች በዚያ ሽፋን ወደ ጦር ካምፓቸው እየተመለሱ ነው:: የሀና የመትረየስ ድምጽ እየራቃቸው ነው:: እነሱ ይተርፉ ዘንድ አንድ አርበኛ መስዋዕት መሆን ግድ አለ:: በተሰጣቸው ግዳጅ ውጤታማነት እየተደሰቱ የሃናን መስዋዕትነት እያወደሱ ከካምፓቸው ምሽት ላይ ደረሱ:: በአርበኞች መንደር ህይወት እንዲህ ናት:: ታጋይ ይሰዋል:: ትግል ይቀጥላል::

…እኩለ ሌሊት ከመድረሱ በፊት ነው:: ጭው ካለው የኤርትራ በረሃ አንድ ሰው ወደ አርበኞቹ መንደር ከኢትዮጵያ ድንበር አቅጣጫ ይገሰግሳል:: በርቀት የተመለከቱት የሌሊት የካምፕ ተረኛ ዋርዲያዎች(ጠባቂዎች) መሳሪያቸውን አስተካክለው ጣት ከቃታ አገናኝተው ወደ ካምፑ እየገሰገሰ ያለውን ሰው ይጠብቃሉ:: ውድቅት ሌሊት ስለነበር ማንነት መለየት አልተቻለም:: የሚገሰግሰው ሰው እየቀረበ ሲመጣ ዋርዲያዎቹም ኢላማቸውን አስተካክለው እርምጃ ለመውሰድ ተዘጋጁ:: ….ሰውዬው ቀረበ:: ሴት ናት::ሃና:: ዋርዲያዎቹ አላመኑም:: የዕለቱን የይለፍ ቃል ጠየቋት:: መለሰችላቸው:: ደክሟታል:: ተአምር የሚያሰኘው ከዚይ የህወሀት ሰራዊት ከበባ ማምለጧ አይደለም:: ሁለት የጦር መሳሪያዎችንም ማርካ ተሸክማለች:: ከሷ መትረየስ ጋር ሶስት:: ዋርዲያዎቹ በሚያዩት ነገር ተደንቀዋል:: በአርበኞች መንደር ስለ ሃና እርም ወጥቷል:: ጉድ ተባለ::

….ሃናን በአካል ሳገኛት በጣም ቁጥብ ነበረች:: ብዙ አትናገርም:: ታሪኳን እንድታጫውተኝ ያደረኩት ጥረት አልተሳካም:: ሲበዛ ዝምተኛ ናት:: ጀግና አይናገርም::
…ሃና ከሰሞኑ ውጊያዎች በአንዱ እንደተሰለፈች እገምታለሁ:: ልብን በኩራት በሚያሞቀው ጀግንነቷ ሁሌም አስታውሳታለሁ:: የጣይቱ ልጅ!!!!!

የአርበኞች ግንቦት ሰባት ወታደሮች በሰሜን ጎንደር የወያኔ ፖሊስ ጣብያ ላይ ጥቃት አደረሱ ተባለ

የአርበኞች ግንቦት ሰባት ታጋዮች  በሰሜን ከጎንደር 50 ኪሎ ሜትር ርቀት በምትገኝ ከተማ ዘልቀው በመግባት የከተማውን ፖሊስ ፅ/ቤት ማጥቃታቸው ተነገረ::

በጥቃቱም ከፍተኛ ጉዳት ያደረሱ ሲሆን በከተማው በፀጥታ ስራ ላይ ተሰማርተው በሚገኙት የመከላከያ ፤ የፀረ ሽምቅ የሚሊሻ እና የመደበኛ ፖሊስ ላይ ለ45 ደቂቃ የቆየ የተኩስ ልውውጥ ማድረጋቸው ተሰምታል::

ከወያኔ በኩል 3 ሰዎች ተመትተው 2 ወዲያውኑ ሲሞቱ አንደኛው ሆስፒታል ገብቶ የህክምና እርዳታ ቢደረግለትም መትረፍ ባለመቻሉ ዛሬ ህይወቱ ሊያልፍ ችሏል ተብላል ::

በውጊያው ወቅት በርካታ የፀጥታ ሀይሎች በመሮጥ ራሳቸውን ሲደብቁ ታይተዋል :: በዚህ ድርጊታቸው የተበሳጨው የዞኑ ኮማድ ፖስት በ12/07/09 ስብሰባ በመጥራት የከተማውን ፖሊስ አዛዥ ፤ በወቅቱ የፀረ ሽምቅ ጋንታ አመራር እና የመከላከያ የቲም አመራር የነበሩትን ከስራ በማገድ ያሰራቸው ሲሆን ሌሎች አመራሮችም በከተማው ከፍተኛ ተኩስ ሲደረግ ከቤትና ከካምፕ ወጥተው ማገዝ ሲገባቸው ይህን ባለማድረጋቸው ከሀላፊነት ታግደዋል ::

ይህን ዘመቻ ያደረጉት የአርበኞች ግንቦት ሰባት ታጋዮች ግዳጃቸውን ጨርሰው ወደ ቦታቸው በሰላም መመለሳቸው ተነግራል ፡፡

%d bloggers like this: